وزیراعلیٰ پنجاب سے چیئرمین این ڈی ایم اے لیفٹیننٹ جنرل انعام حیدر ملک کی ملاقات کی، اس موقع پر پنجاب احساس پروگرام کی سربراہ ڈاکٹر ثانیہ نشتر نے ویڈیو لنک کے ذریعے شرکت کی۔
ڈاکٹر ثانیہ نشتر نے وزیراعلیٰ پنجاب اور چیئرمین این ڈی ایم اے کو سیلاب متاثرین کی بحالی اورامداد کے پروگرام پر تفصیلی بریفنگ دی۔
اس موقع پر گفتگو کرتے ہوئے وزیراعلیٰ پنجاب نے کہا کہ پنجاب میں کورونا کی ساتویں لہر کے خدشے کے پیش نظر حفاظتی اقدامات کا آغاز کر رہے ہیں، سیلاب، امراض اور آفات کی پیشگی اطلاع کا سسٹم نصب کریں گے۔
چوہدری پرویزالٰہی نے کہا کہ 3مقامات پر آفات کی پیشگی نشاندہی کیلئے ارلی وارننگ سسٹم نصب کئے جارہے ہیں، ارلی وارننگ سسٹم نصب ہونے سے بروقت اقدامات ممکن ہوں گے۔
انہوں نے کہا کہ پنجاب میں سیلاب متاثرین کی بحالی کا کام تیزی سے جاری ہے، پنجاب نے اپنے وسائل اور ٹیلی تھون سے جمع ہونے والے عطیات سے سیلاب متاثرین کو بھرپور امداد دی، اب تک سیلاب متاثرین میں5ارب روپے سے زائد تقسیم ہوچکے ہیں۔
وزیراعلیٰ پنجاب نے کہا کہ 36ہزارمتاثرہ خاندانوں کو معاوضوں کی ادائیگی مکمل کی جاچکی ہے، گھروں کی تعمیر کیلئے بھی سیلاب متاثرین کی مالی معاونت کی گئی ہے،55ہزارسے زائد مکمل اور جزوی طور پر تباہ شدہ گھروں کی تعمیر جاری ہے۔
پرویز الٰہی کا کہنا تھا کہ پنجاب میں سیلاب کے بعد ہم سب سے پہلے راجن پور پہنچے اورامدادی سرگرمیوں کا جائزہ لیا، پنجاب حکومت نے سندھ کے سیلاب متاثرین کی مدد کے لئے بھی ایک ارب روپے مختص کئے۔
اس کے علاوہ مری اور دیگر مقامات پر سیاحوں کی سہولت کیلئے خصوصی انتظامات کئے گئے ہیں، بیرون ملک خاص طور پر چین سے آنے والے مسافروں کی اسکریننگ کی جائے گی۔
چیئرمین این ڈی ایم اے لیفٹیننٹ جنرل انعام حیدرملک کا اپنی گفتگو میں کہنا تھا کہ پنجاب کا سیلاب میں ریسکیو اور ریلیف پلان قابل تحسین ہے، ریسکیو 1122نے سیلاب کے دوران قابل قدر خدمات سرانجام دیں۔
انعام حیدر ملک نے کہا کہ جدید ٹیکنالوجی کے ذریعے قدرتی آفات سے30، 40 دن پہلے پیش گوئی ممکن ہے، ماحولیاتی تبدیلی مستقل صورت اختیار کررہی ہے، ہمیں خود کو تیار رکھنا ہوگا۔
