نئی دہلی : ذاتی لڑائی کو مذہبی رنگ دینے کی کوشش کرنے والا مندر کا پجاری پکڑا گیا، ملزم نے خود مورتی توڑ کر اس کا الزام دو مسلم لڑکوں پر عائد کردیا۔
تفصیلات کے مطابق بھارت میں دو مسلمان نوجوانوں پر مورتی توڑنے کا جھوٹا الزام لگانے والے مندر کے پجاری کے خلاف قانونی کارروائی کی جارہی ہے۔
بھارتی ریاست اترپردیش کی مندر کے ایک پجاری نے دو مسلم نوجوانوں کے خلاف تھانے میں شکایت کی تھی کہ انہوں نے مندر میں رکھی مورتیوں کو توڑ دیا ہے۔ تاہم پولیس نے تحقیقات کی تو سنسنی خیز باتیں سامنے آئیں۔
پولیس کے مطابق مورتی کو توڑنے والا کوئی اور نہیں بلکہ مندر کا پجاری ہی ہے۔ پجاری نے محلے کے دو لڑکوں پر جن کا تعلق مسلم برادری سے ہے پر مورتی توڑنے کا جھوٹا الزام لگایا تھا۔
بھارتی میڈیا رپورٹس میں کہا گیا ہے کہ پجاری کا ان دو لڑکوں کے گھر والوں سے فافی عرصہ پہلے جھگڑا ہوا تھا، اس لیے پجاری نے ان لڑکوں کے خلاف پولیس میں ایف آئی آر درج کرائی، لیکن تفتیش کے دوران حقیقت سامنے آگئی اور پجاری پکڑا گیا۔
کرچ رام نامی پجاری نے دعویٰ کیا تھا کہ دونوں لڑکوں نے مندر میں پوجا نہ کرنے کی بھی دھمکی دی تھی، لیکن جب پولیس نے سی سی ٹی وی کے ذریعے تفتیش شروع کی تو پتہ چلا کہ واقعہ کے وقت مندر کے آس پاس پجاری کے علاوہ کوئی اور شخص موجود ہی نہیں تھا اور اطراف میں صرف چند چھوٹے بچے کھیل رہے تھے۔
جب ان بچوں سے پوچھا گیا تو انہوں نے بتایا کہ مورتی خود پجاری نے توڑی ہے، جس کے بعد پولس نے کرچ رام نامی پجاری کو حراست میں لے کر اس سے اچھی طرح پوچھ گچھ کی۔
ملزم نے پولیس کی تفتیش کے دوران نے اپنے جرم کا اعتراف کر لیا، پجاری نے پولیس کو بتایا کہ اس کا منان اور سونو کے خاندانوں کے ساتھ مسلسل جھگڑا تھا۔
میں ان سے بدلہ لینے کے لئے ان کے دونوں لڑکوں کو پھنسانا چاہتا تھا، اس لیے اس نے خود ہی مورتی کو توڑا اور پھر منان اور سونو پر اس کا الزام لگاتے ہوئے پولیس میں جھوٹی رپورٹ درج کرائی۔
