صبح بیدار ہونے پر اپنے والدین اور تین بھائیوں کی لاش دیکھ کر 10 سالہ بچہ شدید سکتے کی حالت میں آگیا۔
امریکی ریاست اوکلاہوما میں افسوسناک واقعہ پیش آیا جہاں ایک شخص نے اپنی بیوی اور تین بیٹوں کو قتل کرنے کے بعد خودکشی کرلی جبکہ اس کا دس سال کا بیٹا اس واقعے میں محفوظ رہا۔ تاہم صبح بیدار ہونے پر گھر کی صورتحال دیکھ کر اس کے حواس گم ہوگئے۔
اوکلاہوما سٹی پولیس نے بتایا کہ بچے نے صبح 9:30 بجے کے قریب 911 پر کال کی اور ایک اہلکار کو بتایا کہ مجھے لگ رہا ہے کہ گھر کے اندر موجود ہر شخص مرچکا ہے۔
سارجنٹ گیری نائٹ نے کہا کہ تفتیش کاروں نے اندازہ لگایا ہے کہ رات کے کسی پہر گھر کے سربراہ اور والد جوناتھن کینڈی کی اپنی بیوی لنڈسے کے ساتھ جھگڑا ہوا جس کی بنا پر اس نے خاتون پر متعدد بار گولی چلائی۔
اس وقت مبینہ طور پر اس نے بچوں کو بھی گولی ماری، جن کی شناخت 18 سالہ ڈیلن کینڈی 14 سالہ ایتھن کینڈی اور 12 سالہ لوکاس کینڈی کے نام سے ہوئی ہے۔
39 سالہ لنڈسے کینڈی اور ایک بچہ گھر کے نیچے والے حصے میں پائے گئے جبکہ باقی دو بچے اوپر کے حصے میں پائے گئے۔ لگتا ہے کہ ایک کو اسکے بستر پر گولی ماری گئی۔
پولیس نے کہا کہ اس رہائش گاہ میں جو کچھ ہوا وہ قتل عام سے کم نہیں تھا، بچوں کو نشانہ بنا کرمارا گیا۔ پولیس کو کال کرنے والا 10 سالہ بچہ کس طرح بچ گیا اس بارے میں ہم نہیں جان پائے۔
گھر والوں کو مارنے کے بعد 42 سالہ جوناتھن کینڈی نے پھر بندوق سے خود کو مالیا۔ زندہ بچ جانے والا 10 سالہ لڑکا اب اپنے رشتہ داروں کی دیکھ بھال میں ہے۔
