اسلام آباد : عمران خان کی نااہلی پر احتجاج پر تحریک انصاف کی مقامی قیادت کے خلاف انسداد دہشت گردی کا مقدمہ درج کرلیا گیا۔
تفصیلات کے مطابق عمران خان کی نااہلی کیخلاف تحریک انصاف کے کارکنوں کے احتجاج کے معاملے پر پولیس نے تحریک انصاف کی مقامی قیادت کے خلاف انسداد دہشت گردی کا مقدمہ درج کرلیا۔
مقدمہ سرکار کی مدعیت میں تھانہ آئی 9 میں درج کیا گیا ، مقدمے میں عامر کیانی ، قیوم عباسی،فیصل جاوید ، راجہ راشد حفیظ ، عمرتنویر بٹ، راشدنسیم عباسی اور راجہ ماجد کو مقدمے میں نامزد کیا گیا ہے۔
ایف آئی آر کے متن میں کہا گیا ہے کہ تحریک انصاف کے کارکنوں نے پولیس، ایف سی اور انتظامیہ پر پتھراؤ کیا، پتھراؤ سے متعدد پولیس اور ایف سی کے اہلکار زخمی ہوئے۔
مقدمے کے مطابق مظاہرین نے قتل کی نیت سے پولیس اہلکاروں پر گاڑیاں چڑھانے کی کوشش کی اور فیض آباد سمیت قریبی علاقوں میں درختوں کوآگ لگائی۔
ایف آئی آر میں کہا کہ مظاہرین نے سرکاری املاک کو بھی نقصان پہنچانے کی کوشش کی۔
