رینجرز اور پولیس نے کراچی کے علاقے لیاقت آباد میں مشترکہ کارروائی کرتے ہوئے ایم کیو ایم لندن کے دہشتگرد وسیم جاوید عرف وسیم باس کو گرفتار کرلیا ہے۔
ترجمان رینجرز کے مطابق گرفتار ملزم انتہائی مطلوب اور بھارتی خفیہ ایجنسی را سے تربیت یافتہ ہے اور اس کے قبضے سے اسلحہ اور دھماکا خیز مواد بھی برآمد ہوا ہے، ملزم را سے بارودی مواد تیار کرنے، اس کے استعما ل اور ہتھیاروں کو چلانے کی تربیت حاصل کی ہوئی ہے۔
ترجمان رینجرز کا کہنا ہے کہ ملزم وسیم جاوید عرف وسیم باس بھتہ خوری، قتل، اقدام قتل اور دہشت گردی کی متعدد وارداتوں میں ملوث ہے، وہ ایم کیو ایم لندن کے سیکٹر لیاقت آباد کا کارکن رہا ہے اور ٹارگٹ کلنگ ٹیم کو چلاتا رہا ہے۔
ترجمان رینجرز کے مطابق ملزم نے نومبر2013 تک کراچی میں بڑے پیمانے پر دہشت گردی کرنے کا اعتراف کرلیا ہے، وسیم باس کے مطابق وہ 2013 کے آپریشن میں گرفتاری سے بچنے کیلئے بیرون ملک فرارہو گیا تھا۔
رینجرز کا کہنا ہے کہ ملزم حال ہی میں کراچی واپس پہنچا تھا، اس کو گرفتار کرکے پولیس کے حوالے کردیا گیا ہے جب کہ اس کے دیگر ساتھیوں کی گرفتاری کیلیے چھاپے مارے جا رہے ہیں۔
