کراچی: ٹیسٹ کرکٹر محمد عباس نے کہا کہ اللہ کا شکر ہے اپنی کارکردگی سے مطمئن ہوں، میری نظریں ورلڈ کپ پر مرکوز ہیں، موقع ملا تو مایوس نہیں کروں گا۔
ان خیالات کا اظہار انہوں نے میڈیا سے گفتگو کرتے ہوئے کیا، محمد عباس نے کہا کہ ون ڈے اور ٹی ٹوینٹی میں بھی اپنی کارکردگی کے جوہر دکھانے کے لیے بے چین ہوں موقع ملا تو مایوس نہیں کروں گا، بورڈ اور مینجمنٹ کو جب بھی ضرورت ہوگی میں حاضر ہوں۔
فاسٹ بولر نے کہا کہ ویسٹ انڈڈیز، آسٹریلیا اور دیگر ٹیموں کے خلاف پرفارمنس شاندار رہی، اچھی کارکردگی کے بعد ذمہ داری اور بھی بڑھ گئی ہے، کرکٹ انجوائے کررہا ہوں، انگلینڈ میں کاؤنٹی کھیلنے سے کافی فائدہ ہوا ہے۔
محمد عباس نے کہا کہ جو بھی فارمیٹ ہو بھرپور کارکردگی دکھانے کی کوشش ہوتی ہے، ٹیم بھرپور فارم میں ہے امید ہے ون ڈے سیریز میں بھی کامیابی ملے گی، میری نظریں ورلڈ کپ پر ہیں موقع ملا تو ورلڈ کپ میں عمدہ کارکردگی کا مظاہرہ کروں گا۔
مزید پڑھیں: کیا محمد عباس عظیم فاسٹ بولر ہیں؟ ڈیل اسٹین کا اہم بیان سامنے آگیا
واضح رہے کہ آسٹریلیا کے خلاف دو میچز کی ٹیسٹ سیریز میں عباس نے 17 وکٹیں لی تھیں اور مین آف دی میچ کے ساتھ مین آف دی سیریز کا ایوارڈ بھی ان کے نام رہا تھا۔
فاسٹ بولر نے یو اے ای میں ایک میچ میں دس وکٹیں لینے والے پہلے فاسٹ بالرکا اعزاز اپنے نام کیا، ساتھ ہی بارہ سال بعد دس وکٹیں لینے والے پہلے پاکستانی بولربھی بن گئے۔
یاد رہے کہ جنوبی افریقہ کے مایہ ناز فاسٹ بولر ڈیل اسٹین نے کہا تھا کہ محمد عباس کی صورت میں مستقبل کا نمبر ون بولر دیکھ رہا ہوں، ماضی کے عظیم فاسٹ بولر وقار یونس نے بھی محمد عباس کی صلاحیتوں کو سراہا تھا۔
