ٹیکساس : امریکی ریاست ٹیکساس کی اسمبلی میں پرنس کریم آغا خان کو خراج عقیدت پیش کرتے ہوئے قرارداد منظور کرلی گئی۔
تفصیلات کے مطابق امریکی ریاست ٹیکساس کی اسمبلی نے اسماعیلی کمیونٹی کے پیشوا پرنس کریم آغا خان کو خراج عقیدت پیش کیا۔
پاکستانی نژاد ارکان اسمبلی ڈاکٹر سلیمان لالانی اورسلیمان بھوجانی کی قرارداد کو متفقہ طور پر منظور کرلیا گیا۔
رکن ٹیکساس اسمبلی ڈاکٹرسلیمان لالانی نے کہا کہ انھوں نے زندگی بھرامن ومحبت اور رواداری کا درس دیا، ان کی خدمات ہمیشہ یاد رکھی جائیں گی۔
واضح رہے کہ پرنس کریم آغاخان گزشتہ روز پرتگال کے دارالحکومت لزبن میں انتقال کرگئے تھے، ان کی عمر 88 برس تھی۔ مولانا شاہ کریم الحسینی اسماعیلی کمیونٹی کے 49ویں امام تھے۔
پرنس کریم آغا خان 13 دسمبر 1936ء کو سوئٹزر لینڈ کے شہر جنیوا میں پیدا ہوئے۔ 1957ء میں آغا خان سوم کی رحلت کے بعد پرنس کریم آغا خان کو امام بنایا گیا۔
شاہ کریم الحسینی آغا خان چہارم اسماعيلى مسلمانوں کے سب سے بڑے گروہ نزاریہ جو اب آغا خانی یا اسماعیلی کہلاتے ہیں کے امام ہیں۔
وہ دورانِ تعلیم ہی جانشین بن گئے تھے اور اسی زمانے میں امامت کی اہم ذمہ داری انھیں سونپ دی گئی تھی، تاہم 1958ء میں انھوں نے اپنے سلسلہ تعلیم کا دوبارہ آغاز کیا، اس دوران میں انہوں نے متعدد تحقیقی مقالات بھی لکھے
