اس وقت سندھ بھر میں قیامت خیز گرمی پڑ رہی ہے انسان چرند پرند سب آگ برساتی گرمی سے پریشان ہیں تھر میں 112 مور ہلاک ہو چکے ہیں۔
موسمیاتی تبدیلیوں کے باعث پاکستان میں ایک ہی وقت میں کہیں برفباری، طوفانی بارشیں ہو رہی ہیں تو کہیں آگ برساتی گرمی۔ ملک میں گرمیوں کی شدت اور دورانیہ دونوں بڑھ چکے ہیں جس کے اثرات آہستہ آہستہ ظاہر ہو رہے ہیں۔
سندھ کے کئی علاقے اس وقت دہکتے تندور بنے ہوئے ہیں جہاں درجہ حرارت 45 ڈگری سے بھی تجاوز کر چکا ہے۔
سندھ کے صحرائی علاقہ تھرپارکر بھی ان دنوں شدید گرمی کی لپیٹ میں ہے۔ یہ علاقہ پہلے ہی پانی کی قلت سے دوچار ہے، اس پر گرمی نے اس پسماندہ ضلع کے باسیوں کی زندگی مزید مشکل کر دی ہے۔
مور ایک خوبصورت جانور ہے جو تھرپارکر میں بکثرت پایا جاتا ہے، مگر اس بار گرمی بھی اس خوبصورت پرندے کے لیے موت کا پیغام لائی ہے۔
ضلع تھرپار کے نگرپارکر سمیت مختلف دیہات میں گزشتہ 8 روز کے دوران گرمی کی شدت سے مرنے والے موروں کی تعداد 112 ہو گئی ہے۔
اس حوالے سے ڈائریکٹر پولٹری کا کہنا ہے کہ مور پانی کی کمی اورگرمی کی شدت سے بیمار پڑجاتے ہیں۔ محکمہ وائلڈ لائف کی ٹیمیں موروں کو بچانے کے لیے اقدامات کر رہی ہیں۔
