بدین: سندھ کے ضلع بدین میں گدھوں کی خریدوفروخت کے لیے لگائی جانے والی سالانہ منڈی سج گئی جہاں نایاب نسل کے گدھے فروخت کے لیے لائے گئے۔
تفصیلات کے مطابق ہر سال کی طرح امسال بھی ضلع بدین کے شہر ٹنڈو غلام علی میں گدھوں کی سالانہ منڈی سجائی گئی جہاں ملک کے مختلف علاقوں سے مالکان نایاب نسل کے گدھے فروخت کے لیے لائے۔
گدھوں کی خریداری کے لیے کراچی سمیت ملک کے طول عرض سے لوگ بدین پہنچ رہے ہیں، زیادہ تر افراد گدھوں کی خریداری مال برداری کے لیے کرتے ہیں۔
منڈی میں لاسی نسل کے سفید گدھے سب سے قیمتی تصور کئے جاتے ہیں جبکہ ایرانی نسل کے کالے گدھے بھی توجہ کا مرکز ہیں۔
مہنگا ترین گدھا لاسی نسل کا ہے جو اپنے قد کاٹھ کی وجہ سے 3 لاکھ روپے میں فروخت کیا جارہا ہے، ان گدھوں کو دوڑ میں بھگانے کے لیے استعمال کیا جاتا ہے۔ دس محرم کے روز لگائی جانے والی منڈی آج شام ختم ہوگئی۔
منتظمین کے مطابق ہر سال 70 سے 80 ہزار گدھے منڈی لائے جاتے ہیں جس میں سے 80 فیصد فروخت ہوجاتے ہیں۔
