کراچی: وزیراعظم عمران خان کا کہنا ہے کہ تاجر برادری معیشت کا اہم حصہ ہے، ملک میں سرمایہ کاری آ رہی ہے، روزگار کے مواقع کھلنے والے ہیں۔
تفصیلات کے مطابق وزیراعظم عمران خان سے تاجربرادری اور صنعت کاروں نے ملاقات کی۔ گورنر سندھ، حفیظ شیخ، جہانگیر ترین،عمرایوب اور دیگر بھی ملاقات میں شریک تھے۔ ملاقات میں ملکی معاشی صورت حال سے متعلق امور پر تبادلہ خیال کیا گیا۔
وزیراعظم نے کہا کہ تاجر برادری معیشت کا اہم حصہ ہے، مل کر مسائل کا حل نکال لیں گے، صنعت کار، تاجرحکومت سے مل کر معاشی عمل کو تیز کریں۔
وزیراعظم عمران خان نے کہا کہ معیشت کی بحالی، استحکام کے لیے اسٹیک ہولڈرز کو ساتھ چلنا ہوگا، ملک میں سرمایہ کاری آ رہی ہے، روزگارکے مواقع کھلنے والے ہیں، معاشی سرگرمیوں کا فروغ،غربت کا خاتمہ اولین ترجیح ہے۔
بزنس کمیونٹی کو آرڈیننس کے ذریعے نیب سے الگ کردیا، وزیراعظم
اس سے قبل وزیراعظم عمران خان کا تقریب سے خطاب کرتے ہوئے کہنا تھا کہ بزنس کمیونٹی کو نیب کا خوف تھا، بزنس کمیونٹی کو آرڈیننس کے ذریعے نیب سے الگ کر دیا۔
وزیراعظم کا کہنا تھا کہ حکومت کی کارکردگی کو آپ کے سامنے رکھوں گا، ہماری معاشی ٹیم بر وقت بزنس کمیونٹی کے لیے میسر ہوگی، 2019 معاشی استحکام اور 2020 ترقی کا سال ہوگا۔
