بلوچستان ہائیکورٹ نے 27 جون کو ہونے والے چیئرمین پی سی بی کے انتخاب کو آئندہ احکامات تک روک دیا۔
تفصیلات کے مطابق بلوچستان ہائیکورٹ میں پی سی بی کے بورڈ آف گورنرز کی تشکیل کیخلاف آئینی درخواست پر سماعت کے بعد چیف جسٹس نعیم اختر افغان اور جسٹس عامر نواز رانا نےتحریری حکمنامہ جاری کر دیا۔
سابق مینجمنٹ کمیٹی کے ممبرگل محمد کاکڑ نےآئینی درخواست دائر کر رکھی ہے۔ عدالت نے بورڈ آف گورنرزکی تشکیل کی خلاف درخواست قابل سماعت قرار دیتے ہوئے فریقین کو نوٹس جاری کر دیے۔
درخواست میں مؤقف اختیار کیا گیا ہے کہ بورڈ آف گورنرز سابق مینجمنٹ کمیٹی کی نامزدگیوں کے برخلاف تشکیل دیا گیا کل مجوزہ بورڈ آف گورنرز کا اجلاس اور چیئرمین پی سی بی کا انتخاب غیرقانونی ہوگا۔
عدالت نے ایڈیشنل اٹارنی جنرل سمیت دیگر فریقین کو نوٹسز جاری کرتے ہوئے تحریری حکمنامہ جاری کر دیا۔ آئینی درخواست پر سماعت عید اور موسم گرما کی تعطیلات کے بعد17 جولائی کو مقرر کی گئی ہے۔
