جیو سوپر کا بغیر رائٹس پی ایس ایل کے میچز دکھانے کے کیس میں سندھ ہائیکورٹ نے فیصلہ سنا دیا ہے اور عدالت نے جیو سوپر کو پی ایس ایل کے میچز دکھانے سے روک دیا ہے۔
اے آر وائی نیوز کے مطابق جیو سوپر کا بغیر رائٹس پی ایس ایل کے میچز دکھانے کے کیس میں سندھ ہائیکورٹ نے فیصلہ سنا دیا ہے اور عدالت نے جیو سوپر کو پی ایس ایل کے میچز دکھانے سے روک دیا ہے اور فریقین کی درخواستوں پر 17 فروری کیلئےنوٹس جاری کر دیے ہیں۔
اس حوالے سے بیرسٹر ایان میمن نے اے آر وائی نیوز سے گفتگو کرتے ہوئے بتایا کہ جیو سوپر بغیر رائٹس کے میچز دکھا رہا تھا۔ جیو سوپر کی جانب سے میچز دکھانے پر عدالت سے رجوع کیا گیا اور سندھ ہائیکورٹ نے اے آر وائی کے ساتھ ہونے والے اصل معاہدے کی روشنی میں فیصلہ دیا ہے۔
بیرسٹر ایان ملک نے مزید بتایا کہ پی ایس ایل رائٹس کیلیے جیو نے بڈنگ کم دی تھی۔ جیو سوپر کی جانب سے میچز دکھانا معاہدے کی خلاف ورزی ہے۔ سندھ ہائیکورٹ نے معاہدے کو دیکھ کر فیصلہ جاری کیا اور کہا کہ معاہدے کے مطابق جیو سوپر پی ایس ایل 8 کے میچز نہیں دکھا سکتا ہے۔
انہوں نے کہا کہ عدالت کے اس فیصلے بعد جیو سوپر اب پی ایس ایل 8 کے میچز نہیں دکھا سکتا ہے۔ اگر اس نے میچز دکھائے تو یہ توہین عدالت ہوگی۔
بیرسٹر ایان ملک نے بتایا کہ فیصلے کے وقت پی ٹی وی اور جیو سوپر کے وکیل بھی عدالت میں موجود تھے۔ پی ٹی وی اور جیو سوپر کے درمیان ایک معاہدہ ہوا جس پر13 فروری کی تاریخ ہے۔ پی ٹی وی کا مؤقف تھا کہ ہم نے جیو سوپر کو سب لائسنس دیا ہے۔
ان کا کہنا تھا کہ پی ایس ایل رائٹس کیلیے پی سی بی نے پی ٹی وی اور اے آر وائی نیوز سے معاہدہ کیا تھا۔ اس معاہدے کے مطابق اے آر وائی نیوز، ٹین اسپورٹس اور پی ٹی وی کو میچز دکھانے کی اجازت ہے۔ جیو سوپر اور پی ٹی وی کے معاہدے پر اے آر وائی نیوز کی رضامندی شامل نہیں۔-
