لاہور: وزیراعلیٰ پنجاب کی معاون خصوصی برائے اطلاعات فردوس عاشق اعوان نے کہا ہے کہ کفایت شعاری مہم کے باعث مسلسل پانچویں ماہ بھی کرنٹ اکاؤنٹ سرپلس ہوا۔
تفصیلات کے مطابق سماجی رابطے کی ویب سائٹ ٹوئٹر پر فردوس عاشق اعوان نے ٹوئٹ کیا کہ مالی مشکلات کا مقابلہ حکمت عملی کے ساتھ جاری ہے، کفایت شعاری کے باعث مسلسل پانچویں ماہ بھی کرنٹ اکاؤنٹ سرپلس ہوا، کورونا کے دوران مالی مشکلات کے باوجود عوام کو56ارب کا ٹیکس ریلیف ملا ہے۔
*مالی مشکلات کا مقابلہ، حکمت عملی کے ساتھ*
کفایت شعاری کے باعث مسلسل پانچویں ماہ کرنٹ اکاؤنٹ سرپلس، کورونا کے دوران مالی مشکلات کے باوجود عوام کو 56ارب کا ٹیکس ریلیف، وصولیوں کی مد میں رواں مالی سال کے ابتدائی6ماہ میں گذشتہ سال کی نسبت 42فیصد اضافہ اور دیگر عوام دوست اقدامات؛— Dr. Firdous Ashiq Awan (@Dr_FirdousPTI) January 3, 2021
ان کا کہنا تھا کہ وصولیوں کی مد میں رواں مالی سال کے ابتدائی6ماہ میں 42فیصداضافہ ہوا، بزدار حکومت کی کاوشوں کی بدولت معاشی اعشاریے بہتر ہیں۔
معاون خصوصی نے ٹوئٹر پر لکھا کہ شوبازاینڈ کمپنی نے بےدردی سے عوامی پیسہ لوٹا۔
فردوس عاشق اعوان کا مزید کہنا تھا کہ پنجاب کو1200ارب کے قرض میں ڈبو کر ن لیگ نے معاشی گھاؤ دیے، بزدار حکومت وزیراعظم کی زیر سرپرستی ان زخموں کا مداوا کررہی ہے۔
