اسلام آباد: وزیرخارجہ شاہ محمود قریشی نے کروناوائرس کے پیش نظر ایران سے ہمدردی کا اظہار کرتے ہوئے کہا ہے کہ ہم اس مشکل گھڑی میں تہران حکومت کے ساتھ کھڑے ہیں۔
تفصیلات کے مطابق وزیر خارجہ نے ایران پر عائد پابندیوں کے حوالے سے اہم بیان جاری کرتے ہوئے مطالبہ کیا کہ ایران پر عائد معاشی پابندیاں انسانیت کے ناطے ہٹائی جائیں، کرونا وبا کی وجہ سے ایران شدید مشکلات کا شکار ہے۔
ان کا کہنا تھا کہ ہزاروں کی تعداد میں لوگ وبا سے متاثر ہیں، اموات کی شرح زیادہ ہے، معاشی پابندیوں کے باعث ایران کو شدید مشکلات کا سامنا ہے، ایرانی صدر حسن روحانی نے وزیراعظم سے بذریعہ خط کردار ادا کرنے کی بھی درخواست کی، بعد ازاں ایرانی وزیر خارجہ سے بات ہوئی تو انہوں نے بھی یہی درخواست کی۔
ایرانی سفیر کا شہباز شریف کو خط، امریکی پابندیوں کا معاملہ اٹھانے کی اپیل
وزیرخارجہ کا مزید کہنا تھا کہ انسانی ہمدردی کے پیش نظر ایران پر عائد پابندیوں کو اٹھایا جائے، ایران کو دواؤں، وینٹی لیٹرز اور متعلقہ سامان کی اشد ضرورت ہے، معاشی پابندیاں ان اشیا کے حصول میں آڑے آ رہی ہیں، پاکستان نے پابندیوں کے خلاف خاتمے کے لیے کاوشوں کا آغاز کر دیا، باہمی تعاون کے ذریعے عالمی چیلنج کا مقابلہ کرنا ہے۔
خیال رہے کہ گزشتہ روز پاکستان میں ایران کےسفیر سید محمد علی حسینی نے قائد حزب اختلاف شہبازشریف کو بھی خط لکھ کر امریکی پابندیوں کے باعث کررونا سے نمٹنے میں درپیش مسائل سے آگاہ کیا تھا۔
ایرانی سفیر کے خط میں کہا گیا تھا کہ کرونا سے نمٹنے کے لیے ادویات اور ضروری سامان درکار ہے تاہم امریکی پابندیوں کی وجہ سےعلاج میں مشکلات پیش آرہی ہیں۔
