معروف اسٹریمنگ پلیٹ فارم نیٹ فلکس نے حال ہی میں ریلیز ہونے والی فلم ’دی گرے مین ‘کا سیکوئیل بنانے کا اعلان کردیا۔
غیر ملکی مصنف مارک گرینے کے ناول کی کہانی پر مبنی فلم ’دی گرے مین‘رواں ماہ بائیس جولائی کو ریلیز کی گئی تھی جو شائقین کے دل میں گھر کرگئی، کامیابی کے بعد اسکے سیکوئیل بنانے کا اعلان کیا گیا۔
فلم میں کینیڈین اداکار ریان گوسلنگ نے سی آئی اے ایجنٹ کا کردار ادا کیا ہے جبکہ بالی ووڈ اداکار دھنوش نے بھی فلم میں اداکاری کے جوہر دکھائے ہیں، تاہم فلم کے سیکوئیل میں بھی ریان گوسلنگ کو کاسٹ کرنے کا فیصلہ کیا گیا ہے۔
اسٹریمنگ پلیٹ فارم نے اپنی پریس ریلیز میں کہا ہے کہ ’دی گرے مین‘کے لیے شائقین کا ردعمل بہت عمدہ تھا، ہم دنیا بھر میں موجود تمام شائقین کے جذبے کو سراہتے ہیں۔
واضح رہے کہ یہ فلم دو ہزار نو میں تحریر کردہ مارک گرینے کے ناول ” دی گرے مین ” سے ماخوذ ہے۔
