گزرتے ہوئے وقت کے ساتھ سائنس و ٹیکنالوجی جہاں ہر شعبہ میں تیزی سے ترقی کر رہی ہے وہیں محبت کرنے والے اور قریبی عزیز و اقارب بھی اس کے ثمرات سے محروم نہیں۔
حال ہی میں ایک ایسی انگوٹھی تیار کی گئی ہے جسے پہننے کے بعد آپ کے کسی عزیز کے دل کی دھڑکن آپ کو اپنی انگلیوں پر محسوس ہوگی۔
یہ انگوٹھی ان چاہنے والے افراد کے لیے ایک نعمت ہے جو کسی مجبوری کے باعث الگ الگ شہروں یا ممالک میں رہائش پذیر ہیں۔ یہ انگوٹھی دو افراد کو ہر وقت ایک دوسرے سے باخبر رکھے گی چاہے وہ دنیا کے کسی بھی کونے میں بیٹھے ہوں۔
اسے تیار کرنے والی کمپنی ’دا ٹچ‘ نے اسے ایچ بی رنگ کا نام دیا ہے۔
انگوٹھی پر عکسی تصاویر کھینچنے کی تکنیک ۔ رنگ فوٹوگرافی *
اس انگوٹھی کے اندر دل کی دھڑکن کو جانچنے کا سینسر اور بیٹری لگائی گئی ہے اور اوپر سے اسے سنہرے رنگ کی خوبصورت تہہ سے ڈھانپا گیا ہے تاکہ یہ پہننے میں بھدی نہ لگے۔
یہ اسمارٹ فون کی ایک ایپ کے ذریعہ دوسرے شخص کے فون سے منسلک ہوگی اور اسی کے ذریعہ کام کرے گی۔ پہننے والا جب چاہے اپنے عزیز کی دل کی دھڑکن اپنی انگلیوں پر محسوس کرسکے گا۔ انگوٹھی کو ایکٹیویٹ کرنے کے لیے اسے ہلکا سا تھپکنا ہوگا۔
کسی ناگہانی، ایمرجنسی یا غیر متوقع صورتحال میں دل کی دھڑکن بے ترتیب ہونے کی صورت میں بھی میلوں دور بیٹھے شخص کو فوراً اس کا پتہ چل جائے گا۔
انگوٹھی جلد ہی مارکیٹ میں پیش کردی جائے گی۔
