ایچ بی ایل پی ایس ایل 8 کا چوتھا میچ آج نیشنل اسٹیڈیم میں کراچی کنگز اور اسلام آباد یونائیٹڈ کے درمیان کھیلا جائے گا دونوں ٹیموں کے کھلاڑی گولڈن کیپس پہن کر میدان میں اتریں گے۔
اے آر وائی نیوز کے مطابق ایچ بی ایل پاکستان سپر لیگ 8 کے سنسنی خیز مقابلے جاری ہیں۔ آج ایونٹ کی سب سے مقبول ٹیم کراچی کنگز اور اسلام آباد یونائیٹیڈ کراچی کے نیشنل اسٹیڈیم میں رات ساڑھے 7 بجے ایک دوسرے کے مدمقابل آئیں گے۔
آج کے میچ کو جیت کر جہاں کراچی کنگز کم بیک کی کوشش کرے گی وہیں اسلام آباد یونائیٹیڈ بھی ٹورنامنٹ میں فاتحانہ آغاز کے لیے بے قرار ہوگی۔ شائقین کرکٹ آج بھی ایک دلچسپ مقابلے کی توقع کر رہے ہیں۔
میگا ایونٹ میں آج بچوں کے کینسر سے آگاہی کا دن منایا جائے گا۔ اسی مناسبت سے دونوں ٹیموں کے کھلاڑی آج کے میچ میں گولڈن کیپس اور گولڈن ربنز پہن کر میدان میں اتریں گے۔
پی سی بی کے مطابق آج کے میچ میں کینسر سے متاثرہ دو مریض بچوں اور کینسر سے صحتیاب ہونے والے 5 بچوں کی فیملیز کو دعوت دی گئی ہے۔ دونوں ٹیموں کے کپتان دستخط شدہ شرٹس انہیں پیش کریں گے۔
پی سی بی کا کہنا ہے کہ آج کے میچ میں کمنٹیٹرز بھی گولڈن ربنز پہن کر کمنٹری کے دوران کینسر سے آگاہی کے پیغامات دیں گے۔ میچ کی اسٹمپس بھی گولڈن میں برینڈ کی جائیں گی۔ واضح رہے کہ پی سی بی مسلسل پانچویں برس بچوں کے کینسر سے آگاہی کا دن منا رہا ہے۔
دوسری جانب اگر اب تک پی ایس ایل ایونٹ میں دونوں ٹیموں کے باہمی مقابلوں کی بات کی جائے تو کراچی کنگز اور اسلام آباد یونائیٹڈ اب تک 18 بار ایک دوسرے کے مدمقابل آئے ہیں۔ اس میں یونائیٹڈ نے 12 فتوحات حاصل کیں جب کہ کراچی کنگز نے 6 بار میدان مارا ہے۔
کراچی کنگز کے کپتان عماد وسیم اور سینیئر کھلاڑی شعیب ملک پشاور زلمی کے خلاف میچ میں پہلے ہی اپنی فارم دکھا چکے ہیں آج یونائیٹڈ کیخلاف میچ میں میتھیو ویڈ، شرجیل خان اور حیدر علی سے بھی امیدیں وابستہ ہیں۔ تو اسلام آباد یونائیٹڈ آل راؤنڈر کپتان شاداب خان سمیت پال اسٹرلنگ، منرو اور آصف بھی اپنے جارح مزاج بلے بازی سے مخالف بولرز کے چھکے چھڑانے کی صلاحیت رکھتے ہیں۔
یہ بھی پڑھیں: پی ایس ایل 8، آج کراچی کنگز اور اسلام آباد یونائیٹڈ کا جوڑ پڑے گا
پی ایس ایل 8 کے تمام میچز اے اسپورٹس پر براہ راست دکھائے جا رہے ہیں۔