The news is by your side.

Advertisement

وزیراعظم نے گورنر بلوچستان سے استعفی طلب کرلیا

اسلام آباد: وفاقی حکومت نے گورنر بلوچستان امان اللہ یاسین زئی کو تبدیل کرنے پر غور شروع کردیا ہے، اسی سلسلے میں وزیراعظم عمران خان نے گورنر بلوچستان کو خط لکھ دیا ہے۔

ذرائع کے مطابق وفاقی حکومت نے گورنر بلوچستان کو ہٹانے کا فیصلہ کیا ہے اور نئے گورنر بلوچستان کے ناموں پر مشاورت بھی شروع کردی ہے، نئے گورنر بلوچستان کون ہوگا؟ اس کا حتمی فیصلہ وزیراعظم عمران خان کرینگے۔

ذرائع کا کہنا ہے کہ وزیراعظم عمران خان نے گورنربلوچستان کو خط لکھا ہے، خط میں گورنربلوچستان جسٹس (ر)امان اللہ خان سے مستعفی ہونےکا کہا گیا ہے، وزیراعظم نے اپنے خط میں کہا کہ بلوچستان میں نیاگورنر تعینات کرنا چاہتا ہوں، آپ سے درخواست ہےکہ مستعفی ہو جائیں۔

دوسری جانب ذرائع کا کہنا ہے کہ گورنر بلوچستان کے لئے تحریک انصاف کے ظہور آغا، فیض کاکڑ، سعیدمندو خیل اور نصیب اللہ بازئی کےناموں پر بھی غور شروع کردیا گیا ہے۔

واضح رہے کہ وفاقی حکومت نے تین اکتوبر 2018 میں محمد خان اچکزئی کے استعفے کے بعد امان اللہ یاسین زئی کو نیا گورنر نامزد کیا تھا۔

جسٹس (ر) امان اللہ یاسین زئی 7 اگست 1954 کو پیدا ہوئے، 27 جنوری 1997 میں بلوچستان ہائیکورٹ میں بطور جج تعینات ہوئے، 14 ستمبر 2005 کو چیف جسٹس بلوچستان ہائیکورٹ بنے اور 5 اگست 2009 تک بطور چیف جسٹس ذمہ داریاں انجام دے چکے ہیں۔

Comments

یہ بھی پڑھیں