اسلام آباد: وزیراعظم عمران خان کا کہنا ہے کہ ملک کا استحکام اداروں کی آزادی میں ہے، احتساب کے بغیر گورننس میں شفافیت کا تصور نہیں ہے۔
تفصیلات کے مطابق وفاقی دارالحکومت اسلام آباد میں وزیراعظم عمران خان سے سابق وزیر قانون بابراعوان نے ملاقات کی۔ وزیراعظم کو مختلف قانونی اور آئینی امور پربھی بریفنگ دی گئی۔
اس موقع پر وزیراعظم عمران خان نے کہا کہ ملک کا استحکام اداروں کی آزادی میں ہے، احتساب کے بغیر گورننس میں شفافیت کا تصور نہیں ہے، ادارہ جاتی ریفارمز کو آگے بڑھائیں گے۔
وزیراعظم پاکستان کا کہنا تھا کہ پاکستان عالمی برادری میں با عزت مقام پر پہنچ گیا، 2020عوام کے لیے ریلیف کا سال ہے۔
دوسری جانب تحریک انصاف کے رہنما بابر اعوان کا کہنا تھا کہ احساس پروگرام، پناہ گاہیں اور لنگرخانے فلاحی ریاست کے لیے قدم ہے۔
انہوں نے کہا کہ معاشی حالات میں تیزی سے آتی بہتری شاندار مستقبل کی نوید ہے، ترسیلات زر میں حالیہ اضافہ وزیراعظم پر اعتماد کا مظہر ہے، 2020 میں معاشی پالیسیوں کے ثمرات عوام تک پہنچیں گے۔
