واشنگٹن: امریکی صدر ڈونلڈ ٹرمپ نے کروناوائرس کے پیش نظر میگا باکسنگ ایونٹ کے انعقاد میں تاخیر پر مارشل آرٹس انتظامیہ کا خصوصی طور پر شکریہ ادا کیا۔
غیرملکی خبررساں ادارے کی رپورٹ کے مطابق صدر ٹرمپ نے الٹیمیٹ فائٹنگ چیمپئن شپ (یو ایف سی) انتظامیہ کا شکریہ ادا کرتے ہوئے کہا ایسے وقت میں جب ملک وبا کا شکار ہے باکسنگ ایونٹ میں تاخیر قابل ستائش عمل رہا۔
دو ماہ کے انتظار کے بعد امریکی ریاست فلوریڈا کے اسٹیڈیم میں بغیر کسی تماشائی کے حریفوں کے درمیان ’یو ایف سی 249‘ فائٹ کا انتظام کیا گیا۔ ٹرمپ نے کھیل کے انعقاد پر مبارک باد بھی دی۔
ان کا کہنا تھا کہ ہمیں کھیل کی سرگرمیوں سے محبت ہے، اور یہ بہت ضروری بھی ہے، سماجی فاصلوں کا خیال رکھتے ہوئے ہمیں بڑے لیگ اور اہم کھیلوں کی طرف واپس لوٹنا چاہیے۔
خیال رہے کہ دنیا بھر میں کروناوائرس کے پیش نظر کھیلوں کی سرگرمیاں منسوخ کی جاچکی ہیں۔
