کندھکوٹ: سندھ میں آوارہ کتوں کی افزائش روکنے اور ان کے کاٹنے کے واقعات پر تاحال قابو نہیں پایا جاسکا، آج بھی 6 افراد کتے کے کاٹے سے زخمی ہوگئے۔
تفصیلات کے مطابق سندھ کے شہر کندھکوٹ کے علاقے تنگوانی میں آوارہ کتوں نے مزید 6ا فراد کو کاٹ لیا، کتوں کے حملے میں زخمی ہونے والوں میں بچے بھی شامل ہیں جنہیں اسپتال منتقل کردیا گیا۔
متاثرہ افراد کو ویکسین کے لیے تنگوانی اسپتال منتقل کیا گیا ہے، ایم ایس تنگوانی اسپتال کا کہنا ہے کہ متاثرہ افراد کو ویکسین فراہم کردی گئی، جبکہ وہ کسی بھی قسم کے جانی خطرے سے باہر ہیں۔
میئرز سمیت تمام بلدیاتی کونسلرز کو آوارہ کتے پکڑنے کا ٹاسک
خیال رہے کہ رواں سال ستمبر میں شکارپور میں کتے کے کاٹے کی وجہ سے 10 سال کا ایک بچہ جاں بحق ہو گیا تھا، جسے بروقت ویکسین نہیں مل سکی تھی۔
ذرائع کے مطابق سندھ کے سرکاری اسپتالوں میں کرپشن کے باعث کتے کے کاٹے کی ویکسین کمشنر آفس میں رکھی جاتی ہیں، جہاں مریضوں سے شناختی کارڈ اور کتے کی صحت کے بارے میں معلومات کے بعد انجکشن فراہم کیے جاتے ہیں، حکومت سندھ کا یہ بھی دعویٰ ہے کہ سرکاری اسپتالوں میں ویکسین موجود ہے۔
واضح رہے کہ رواں سال کتے کے کاٹنے کے واقعات میں اضافہ دیکھنے میں آیا ہے۔
