ڈھاکہ: بنگلہ دیشی دارالحکومت ڈھاکہ میں پاکستانی ہائی کمیشن میں چوری کا واقعہ پیش آیا ہے جس پر پاکستان نے بنگلہ دیش سے احتجاج کرتے ہوئے سیکیورٹی کو بہتر بنانے کا مطالبہ کیا ہے۔
تفصیلات کے مطابق ترجمان دفتر خارجہ ڈاکٹر محمد فیصل کا کہنا ہے کہ ڈھاکہ میں پاکستانی ہائی کمیشن کے قونصلر سیکشن سے کمپیوٹر چوری کر لیے گئے ہیں۔ ڈکیتی کا معاملہ بنگلہ دیش کے اعلیٰ حکام کے ساتھ اٹھایا ہے۔
ترجمان کا کہنا ہے کہ بنگلہ دیش پولیس کے پاس واقعے کی ایف آئی آر بھی درج کروائی ہے۔ بنگلہ دیشی وزارت خارجہ کو سیکیورٹی مزید بڑھانے کی درخواست کی گئی ہے۔
انہوں نے کہا کہ ڈھاکہ میں پاکستانی ہائی کمیشن انتہائی مصروف اور محفوظ جگہ پر واقع ہے۔ پاکستانی وزارت خارجہ نے اسلام آباد اور ڈھاکہ میں حکام سے شدید احتجاج کیا ہے۔
ترجمان نے مطالبہ کیا کہ بحیثیت میزبان ملک بنگلہ دیش ہائی کمیشن کو سیکیورٹی فراہم کرے، بنگلہ دیشی حکومت تحقیقات کر کے ملزمان کو کٹہرے میں لائے۔
