کراچی: سوشل میڈیا پر وائرل ویڈیو کے باعث پولیس نے اپنے پیٹی بند بھائیوں کو گرفتار کرلیا، گرفتار اہلکاروں نے گذشتہ روز دودھ کی دوکان سے رقم چُرائی تھی۔
ایس ایس ایس کورنگی کی جانب سے میڈیا کو بتایا گیا کہ گذشتہ روز کورنگی میں اسسٹنٹ کمشنر کے ساتھ دودھ کی دکان پر چھاپہ مارنے والے چار پولیس اہلکاروں کو حراست میں لے لیا گیا ہے۔
ایس ایس پی کورنگی نے بتایا کہ چاروں پولیس اہلکاروں نے اسسٹنٹ کمشنر کے چھاپے کے دوران دکان سے رقم لوٹی تھی، واقعے کی سی سی ٹی وی منظر عام پر آنے کے بعد کارروائی عمل میں لائی گئی۔
اے آر وائی نیوز نے کورنگی میں دودھ کی دکان پر چھاپےکےدوران پولیس اہلکار کی چوری کی ویڈیو آن ایئر کی تھی، سی سی ٹی وی فوٹیج میں دیکھا جاسکتا ہے کہ دکاندار کو باہر نکالنے کے بعد پولیس اہلکار نے کیش کاؤنٹر سےرقم چرائی، سی سی ٹی وی فوٹیج میں پولیس اہلکار کو رقم نکالتے واضح دیکھاجاسکتاہے۔
اسسٹنٹ کمشنر کے چھاپے کے دوران پولیس کے ہاتھوں لٹنے والے دکاندار کا بھی موقف سامنے آیا ہے، دکاندار نے بتایا کہ واقعہ گذشتہ شب رات بارہ بجے کورنگی پی اینڈ ٹی سوسائٹی میں پیش آیا، اسسٹنٹ کمشنر کے چھاپے کے دوران پولیس اہلکاروں نے کھڑکی سے اندرجانے کی کوشش کی ، اندر موجود لڑکے نے دروازہ کھولا۔
دکاندار نے بتایا کہ اسی دوران پولیس اہلکاروں نے تمام افراد کو دکان سے باہر نکالا اور اندھیرا کرکےتمام پیسے لوٹے، ہمارے پاس پیسے چوری کرنےکی سی سی ٹی وی فوٹیج موجود ہے۔
