بھارت کے شہر علی گڑھ میں شادی کی تقریب کے دوران دولہا کو لوٹ لیا گیا، چور کھانا کھانے کے بعد زیورات سے بھرا سوٹ کیس لے کر رفو چکر ہوگئے۔
بھارتی میڈیا رپورٹس کے مطابق چوری ہونے والے سوٹ کیس میں 25 لاکھ روپے سے زائد کے زیورات موجود تھے۔ ملزم فرار ہوتے ہوئے سی سی ٹی وی کیمرے کی زد میں آگیا۔
چوری کی یہ بڑی واردات ساسنی گیٹ کے چندر گارڈن میں پیش آئی، پولیس کی جانب سے سی سی ٹی وی کیمروں کی مدد سے ملزم کی تلاش شروع کردی گئی ہے۔
رپورٹس کے مطابق انکشاف ہوا ہے کہ تقریب میں داخل ہونے والے چور نے دلہن کا قریبی بتا کر کارروائی انجام دی۔
سہارنپور میں نائب تحصیل دار کی بیٹی کی شادی کے موقع پر دولہا غازی آباد سے زیورات کا سوٹ کیس لایا تھا جو دلہن کو پیش کیا جانا تھا لیکن اس سے قبل ہی زیورات سے بھرا سوٹ کیس غائب ہوگیا۔ سوٹ کیس میں موجود زیورات کی مالیت تقریباً 25 لاکھ روپے تھی۔
پولیس کا کہنا ہے کہ شادی کی تقریب میں لڑکے والے غازی آباد سے آئے تھے۔ اسی دوران دو نامعلوم نوجوان دعوت اور دیگر پروگراموں میں شریک ہو کر گیسٹ ہاؤس میں دولہا کے کمرے تک پہنچ گئے۔ اس کے بعد وہ 25 لاکھ روپے کے زیورات سے بھرا سوٹ کیس لے کر رفو چکر ہوگئے۔
امریکا: ویک اینڈ پارٹی کے دوران فائرنگ، 3 افراد ہلاک، متعدد زخمی
سوٹ کیس نہ ملنے پر ہر جانب کھلبلی مچ گئی، جبکہ پولیس نے تحقیقات کا آغاز کردیا ہے، تاہم آفیسر پرتھم ابھے پانڈے کے مطابق ایک نوجوان سوٹ کیس لے جاتے ہوئے سی سی ٹی وی کیمرے میں قید ہو گیا ہے۔ جس کی تفتیش کا آغاز کردیا گیا ہے۔
