چور یا ڈاکو کہیں بھی ہوں ان کی کوشش بڑی اور قیمتی چیزوں کو لوٹنے کی ہوتی ہے لیکن امریکا میں ایک چور نے انڈے چُرا لیے۔
امریکا میں ایسا انوکھا واقعہ پیش آیا جہاں چور ایک، دو درجن نہیں بلکہ ایک لاکھ انڈے چوری کر کے لیے گیا۔ چوری کی حیرت انگیز واردات ریاست پنسلوانیا میں پیش آئی۔
غیر ملکی میڈیا کے مطابق پنسلوانیا پولیس کو ایک کمپنی نے چوری کی رپورٹ درج کرائی ہے جس میں بتایا گیا ہے کہ ایک چور اس کے ٹرک سے ایک لاکھ انڈے چوری کر کے فرار ہوگیا۔
رپورٹ میں چوری کیے گئے انڈوں کی مالیت 40 ہزار ڈالر (پاکستانی ایک کروڑ روپے سے زائد) بتائی جا رہی ہے۔
انڈوں کی قیمتوں میں ہوشربا اضافے کی بڑی وجہ امریکا میں آج کل برڈ فلو کا پھیلاؤ ہے۔
ماہرین کا کہنا ہے کہ امریکا میں انڈوں سے جڑی صنعت کو حالیہ مہینوں میں برڈ فلو کے پھیلاؤ کے باعث بحران کا سامنا ہوا۔ برڈ فلو سے لاکھوں مرغیاں ہلاک ہوگئیں، جس کی وجہ سےانڈوں کی رسد میں کمی اور قیمتوں میں اضافہ ہوا ہے۔
بتایا جا رہا ہے کہ قیمتوں میں حالیہ زبردست اضافے کی وجہ سے انڈے چور کے لیے چوری کی پرکشش وجہ بنے۔
