لاہور: شادی کی تقریب میں گئے اہلخانہ کروڑوں کے زیورات سے محروم ہوگئے، چور نے گھر سے 71 تولے سونا اور قیمتی گھڑی چوری کرلی۔
تفصیلات کے مطابق لاہور میں تھانہ جنوبی چھاؤنی کی حدود میں گھر سے ڈھائی کروڑ روپے مالیت کے زیورات چوری ہوگئے، چور نے بڑی صفائی سے بند گھر میں گھس کر الماری سے 71 تولے سونا اور قیمتی گھڑی چرا کر چلتا بنا اور محلے میں کسی کو کانوں کان خبر نہ ہوئی۔
گھروں میں کام کرنیوالے گینگ نے 80 تولے سونا چرا لیا
متاثرہ شہری کی مدعیت میں تھانہ جنوبی چھاؤنی میں مقدمہ درج کرلیا گیا ہے، مقدمے کے متن میں شہری نے بتایا کہ شادی کی تقریب سے واپس آئے تو الماری کا تالا ٹوٹا ہوا تھا۔
متن کے مطابق سونے کے دو ہار، کڑے، چوڑیاں، انگوٹھیاں اورقیمتی گھڑی غائب تھی، گھر پر ڈرائیور سمیت 2 ملازم موجود تھے۔
پولیس نے بتایا کہ ڈھائی کروڑ کے زیورات چوری ہونے کے مقدمے میں گھر میں موجود دونوں ملازمین کو حراست میں لےکر تحقیقات شروع کردی ہے۔
