بہار: بھارتی ریاست بہار میں چوروں نے انجن چرانے کے لیے ریلوے یارڈ میں سرنگ کھود دی۔
میڈیا رپورٹس کے مطابق ریاست بہار کے چوروں نے ریلوے یارڈ میں سرنگ کھود کر مرمت کے لیے لایا ہوا ڈیزل انجن چوری کر لیا۔
چوری کی اس عجیب واردات سے متعلق پولیس حکام نے جمعہ کو میڈیا کو بتایا کہ بیگوسرائے ضلع میں ریلوے یارڈ سے ڈیزل انجن کو چوری کیا گیا، چوروں نے یارڈ میں ایک سرنگ کھودی اور انجن کے پرزے پرزے کر کے آخر کار سارا انجن چوری کر لیا۔
مظفرپور کی ریلوے پروٹیکشن فورس کے انسپیکٹر پی ایس دوبے نے بتایا گزشتہ ہفتے پیش آنے والے اس واقعے میں 3 افراد کو گرفتار کیا جا چکا ہے۔
ملزمان سے تفتیش کے بعد پولیس نے مظفرپور ضلع کے پربھات نگر علاقے میں ایک اسکریپ گودام کی تلاشی لی تو ٹرین کے پرزوں سے بھری 13 بوریاں برآمد ہوئیں۔
پولیس کے مطابق اسکریپ یارڈ کے مالک کی تلاش کی جا رہی ہے، جب کہ برآمد شدہ اشیا میں انجن کے پرزے، ونٹیج ٹرین کے انجنوں کے پہیے اور بھاری لوہے سے بنے ریل روڈ کے پرزے شامل ہیں۔
پولیس کے مطابق چوروں نے ریل روڈ یارڈ تک ایک سرنگ کھودی تھی، اور اس کے ذریعے وہ انجن کے پرزے اور دیگر اشیا بوریوں میں بھر کر لے جاتے تھے، یہ گروہ اسٹیل کے پلوں کو بھی کھولتا ہے اور ان کے پرزے بھی چراتا ہے۔
