ماہ رمضان المبارک شروع ہوچکا ہے اور دنیا بھر سے عمرہ زائرین کی بڑی تعداد مکہ مکرمہ پہنچ رہی ہے جنہیں اس سال نئی سہولت مل رہی ہے۔
عرب میڈیا کے مطابق حرمین شریفین انتظامیہ نے اس سال ماہ رمضان المبارک میں عمرہ زائرین کو پہلی بار مسجد الحرام کے اندر ہی احرام سے باہر نکلنے کے لیے حلق کرانے (بال ترشوانے یا سر منڈوانے) کی سہولت فراہم کی ہے۔
رپورٹ کے مطابق یہ آزمائشی سروس حجاج کرام کو فراہم کی جانے والی خدمات کے معیار کو مزید بہتر بنانے کی کوششوں کا ایک حصہ ہے۔
اس سلسلے میں مروہ کے علاقے کے بالکل سامنے پانچ مختلف مقامات پر موبائل گاڑیوں کے اندر باربر شاپ قائم کی گئی ہیں جو ہجوم کے دوران آگے پیچھے حرکت کر سکیں گی۔
ان سروس سینٹرز پر تجربہ کار افراد کو متعین کیا گیا ہے جو سینیٹائزڈ مواد انتہائی مہارت کے ساتھ استعمال کرتے ہیں۔
زائرین عمرہ مناسب قیمت میں یہ سروس حاصل کر سکتے ہیں اور مکمل طور پر جراثیم سے پاک آلات کے ساتھ تجربہ کار افراد کی زیر نگرانی بال کٹوا کراحرام کی پابندیوں سے نکل سکتے ہیں۔
واضح رہے کہ زائرین حج وعمرہ کے لیے تمام اراکین مکمل کرنے کے بعد احرام سے نکلنے کے لیے پہلے حلق کرانا لازمی ہے۔
حلق میں مرد زائرین پورا سر منڈواتے ہیں یا چوتھائی سر کے بالوں کے مساوی بال کٹواتے ہیں جب کہ خواتین اپنے بالوں کی ایک لٹ کا کچھ ترشوا کر احرام سے باہر آسکتی ہیں۔
