لاہور : مسلم لیگ ن کی قیادت نے رہنماؤں کے وارنٹ گرفتاری جاری ہونے پر ارکان اسمبلی کو محفوظ مقام پر منتقل ہونے کی ہدایت کردی۔
تفصیلات کے مطابق مسلم لیگ ن کے رہنماؤں کے وارنٹ گرفتاری جاری ہونے کے معاملے پر ن لیگی قیادت نے ارکان اسمبلی کو محفوظ مقام پر منتقل ہونے کی ہدایت کردی۔
ذرائع کا کہنا ہے کہ پولیس کا ن لیگ کے مزیدارکان اسمبلی کےگھروں اور دفاتر پر چھاپوں کا خدشہ ہے۔
قیادت کی جانب سے تمام اراکین اسمبلی کو ضمانت قبل از گرفتاری تک اسلام آباد میں رہنے کی ہدایت کی ہے۔
یاد رہے پنجاب اسمبلی میں ہنگامہ آرائی اور چوہدری پرویز الہٰی پر تشدد کیس میں پولیس کی جانب سے وارنٹ گرفتاری جاری ہونے پر مسلم لیگ ن کے 13 رہنماؤں نے حفاظتی ضمانت کیلیے اسلام آباد ہائیکورٹ میں درخواست دائر کردی ہے۔
عدالت میں حفاظتی ضمانت کی درخواست دائر کرنے والوں میں وزیراعظم کے معاون خصوصی عطا تارڑ، اویس لغاری، رانا مشہود، عادل چھٹہ، شعیب برتھ، ملک غلام حبیب شامل ہیں۔
ان کے علاوہ مرزا جاوید، رانا منان، سیف الملوک، پیر خضر حیات، راجا صغیر، عبدالرؤف، بلال فاروق نے درخواست دائر کی ہے۔
درخواست گزار 13 لیگی رہنماؤں نے اسلام آباد ہائیکورٹ سے حفاظتی ضمانت منظور کرنے کی استدعا کرتے ہوئے کہا ہے کہ عدالت ضمانت منظور کرکے پنجاب پولیس کو گرفتاری سے روکے۔
