اسلام آباد : وزیراعظم عمران خان کے خلاف تحریک عدم اعتماد حتمی مرحلے میں داخل ہونے کے بعد ملک میں سیاسی سرگرمیاں عروج پر پہنچ گئی ہیں۔
دوسری جانب غیر ملکی”مراسلے” کے معاملے پر قومی سلامتی کمیٹی کا اجلاس طلب کر لیا گیا ہے، وفاقی وزیر اطلاعات فواد چوہدری کے مطابق قومی سلامتی کمیٹی کا اجلاس جمعرات کو دوپہر وزیراعظم ہاؤس میں ہوگا۔
ذرائع کے مطابق اجلاس میں مبینہ دھمکی آمیز خط کے حوالے سے بریفنگ دی جائے گی، اس کے علاوہ اجلاس میں قومی سلامتی کے امور زیر بحث آئیں گے۔
پاکستان میں سیاسی بحران کے تناظر میں آج کا قومی اسمبلی کا اجلاس غیر معمولی اہمیت اختیار کرگیا ہے۔ ملکی و غیرملکی ذرائع ابلاغ کی نظریں آج کے اجلاس پر مرکوز ہیں۔
علاوہ ازیں وزیراعظم عمران خان کے خلاف اپوزیشن جماعتوں کی جانب سے پیش کی گئی تحریک عدم اعتماد پر بحث آج قومی اسمبلی کے اجلاس میں ہوگی۔ اجلاس آج شام چار بجے شروع ہو گا۔
اپوزیشن لیڈر شہباز شریف کی جانب سے جمع کرائی گئی قرارداد میں کہا گیا ہے کہ وزیراعظم پارلیمان کا اعتماد کھو چکے ہیں، جس کے بعد وہ عہدے پر براجمان نہیں رہ سکتے۔
