بھارتی ٹیم کے کپتان روہت شرما کے پاک بھارت ٹیسٹ سیریز کے بیان کے بعد انگلینڈ کے کرکٹ اسٹیڈیمز سیریز کی میزبانی کے خواہشمند ہیں۔
برطانوی میڈیا کا کہنا ہے کہ پاکستان اور بھارت میں ٹیسٹ سیریز کی بحالی میں انگلینڈ متوقع نیوٹرل وینیو ہوسکتا ہے۔
میڈیا رپورٹ کے مطابق بھارتی حکومت نے تاحال پاکستان کے ساتھ سیریز کی اجازت نہیں دی ہے، دونوں حکومتوں کی جانب سے نیوٹرل وینیو پر راضی ہونے کی صورت میں لارڈز، اوول اور ایجبسٹن ٹیسٹ میچز کی میزبانی کے خواہشمند ہے۔
چیف ایگزیکٹو وارکشائر اسٹیورٹ کین کا کہنا ہے کہ ہم پاک بھارت ٹیسٹ سیریز کے پروپوزل کو بھرپور سپورٹ کریں گے۔
انہوں نے یہ بھی کہا کہ یہ سیریز پورے ریجن اور ویسٹ مڈلینڈز میں رہنے والے بہت سارے پاکستانی اور بھارتی مداحوں کے لیے شاندار ہوگی۔
واضح رہے کہ پاکستان اور بھارت کے درمیان آخری بار ٹیسٹ میچ 2007 میں کھیلا گیا تھا۔
علاوہ ازیں پی سی بی کے چیئرمین محسن نقوی کا کہنا تھا کہ چیمپئنز ٹرافی تک ٹیم بہت مصروف ہے، پہلے بھارتی ٹیم پاکستان آئے پھر ٹیسٹ سیریز کے آپشن پر غور کریں گے۔
