کراچی : شہر قائد کے مختلف علاقوں میں تیزرفتاری کے باعث پیش آنے والے ٹریفک حادثات میں 3 افراد جاں بحق ہوگئے۔
تفصیلات کے مطابق کراچی کے علاقے کارساز کے قریب تیزرفتاری کے باعث رکشے اور موٹرسائیکل میں تصادم ہوا جس کے نتیجے میں موٹرسائیکل پر سوار دو افراد جاں بحق ہوگئے۔
پولیس حکام کا کہنا ہے کہ حادثے میں جاں بحق افراد کی لاشوں کو ضابطے کی کاروائی کے لیےاسپتال منتقل کیا گیا جہاں ایک کی شناخت 22 سالہ عتیق اور دوسرے کی شناخت حسیب کے نام سے ہوئی۔
دوسری جانب کیماڑی گیٹ نمبر پندرہ کے قریب تیز رفتار گاڑی نے موٹرسائیکل سوار کو کچل دیا متوفی کی لاش کو سول اسپتال منتقل کردیا گیا ہے۔
حیدرآباد: ہوسڑی میں ٹریفک حادثہ ‘ 10 افراد جاں بحق
خیال رہے کہ 12 فروری کو ٹنڈو محمد خان روڈ پر ہوسڑی کے قریب تیز رفتار ٹرک اور وین کے درمیان ہونے والے تصادم کے نتیجے میں 10 افراد جان کی بازی ہارگئے۔
یاد رہے کہ گزشتہ برس 24 دسمبر کو صوبہ سندھ میں جامشورو کے قریب انڈس ہائی وے پروین اور دو مسافربسوں میں تصادم کے نتیجے میں 10 افراد جاں بحق ہوگئے تھے۔
