اسلام آباد: وزیراعظم کے معاون خصوصی برائے امور نوجوانان عثمان ڈار نے سوشل میڈیا پر زیر گردش ٹائیگر فورس کے نام سے تیار ہونے والی شرٹس سے اظہار لاتعلقی کر دیا۔
سماجی رابطے کی ویب سائٹ ٹوئٹر پر ردعمل دیتے ہوئے عثمان ڈار نے کہا کہ سوشل میڈیا پر موجود تصاویر کا "ٹائیگر فورس” سے قطعی کوئی تعلق نہیں، حکومتی سطح پر ایسی کوئی شرٹس پرنٹ کروائی جا رہی ہیں نہ حالات ایسے اقدامات کا اجازت دیتے ہیں۔
انہوں نے کہا کہ کورونا ریلیف ٹائیگر فورس مکمل طور پر سیاسی وابستگی سے بالاتر ہے،کورونا ریلیف ٹائیگر فورس کسی ایک جماعت کی نہیں پورے پاکستان کی ہے۔
سوشل میڈیا پر گزشتہ روز سے وائرل ان تصاویر کا وزیراعظم کی ہدایت پر تشکیل دی گئی "ٹائیگر فورس" سے قطعی کوئی تعلق نہیں! حکومتی سطح پر ایسی کوئی شرٹس پرنٹ کروائی جا رہی ہیں نہ حالات ایسے اقدامات کا اجازت دیتے ہیں! کورونا ریلیف ٹائیگر فورس مکمل طور پر سیاسی وابستگی سے بالاتر ہے! pic.twitter.com/ogOXdEJaW9
— Usman Dar (@UdarOfficial) April 3, 2020
عثمان ڈار نے سوشل میڈیا صارفین سے خصوصی اپیل کرتے ہوئے کہا ہے کہ قومی نوعیت کے معاملے کو متنازعہ بنانے کی بجائے حکومت کی کوششوں کا ساتھ دیں، اپنی توانائیاں کورونا وائرس کے پھیلاو کی روک تھام کے لئے مثبت طور پر استعمال کریں۔
واضح رہے کہ کورونا ریلیف سرگرمیوں میں معاونت کے لیے وزیراعظم عمران خان نے ملک بھر میں نوجوانوں پر مشتمل ٹائیگر فورس بنانے کا اعلان کیا ہے اور اب تک 3 لاکھ سے زائد افراد خود کو رجسٹرڈ کروا چکے ہیں۔