دنیا بھر میں گزشتہ چند سالوں کے دوران تیزی سے فروغ پانے والی ٹک ٹاک ایپ نے پاکستان میں کمیونٹی گائیڈ لائنز کے بارے میں آگاہی بڑھانے کے لیے دلچسپ مہم کا آغازکر دیا ہے۔
اس حوالے سے ترجمان ٹک ٹاک کا کہنا ہے کہ اس مہم کے تحت ملک بھر میں کانٹینٹ کریئیٹرز کی رہنمائی کے لیے کمیونٹی گائیڈ لائنز ورکشاپس منعقد کی جائیں گی۔
کمیونٹی گائیڈ لائنز سے متعلق ورکشاپس کانٹنٹ کریئیٹرز کی معلومات میں اضافے کے لیے ڈیزائن کی گئی ہیں، اس سلسلے میں پاکستان کے مشہور کانٹنٹ کریئیٹرز کے اشتراک سے کمیونٹی گائیڈ لائنز کے بارے میں آگاہی فراہم کی جائے گی۔
ترجمان کا کہنا ہے کہ یہ مہم ٹک ٹاک کی اپنی کمیونٹی کی حفاظت اور بہبود کے لیے کیے جانے والے اقدامات کا ایک حصہ ہے۔ مہم کا مقصد ذمہ دارانہ کانٹنٹ کریئشن کے طریقوں کی حوصلہ افزائی اور محفوظ ڈیجیٹل ماحول کو فروغ دینا ہے۔
انہوں نے کہا کہ کمیونٹی گائیڈ لائنز ابھرتے ہوئے ٹرینڈز اور ممکنہ خطرات سے نمٹنے کے لیے تیار کی گئی ہیں۔ ہیش ٹیگ سفرٹوگیدر کے تحت مذکورہ مہم کا لینڈنگ پیج پاکستانی کمیونٹی کے لیے قابل رسائی ہوگا۔
ترجمان ٹک ٹاک کا مزید کہنا ہے کہ ٹک ٹاک اپنی کمیونٹی گائیڈ لائنز کی اہمیت کے حوالے سے لوگوں کو آگاہی فراہم کرنے میں مسلسل سرمایہ کاری کررہا ہے۔
