لاہور: ون ویلر ٹک ٹاکر شاہنوازعرف چھوٹا بچہ کو پولیس نے گرفتار کرلیا، ملزم کی ون ویلنگ کی وائرل ویڈیو پر ڈی آئی جی آپریشنز نے نوٹس لیا تھا۔
اعلیٰ حکام کی ہدایت پر شفیق آباد ڈولفن ٹیم نے کارروائی کرتے ہوئے ملزم کو گرفتار کیا، ملزمان روڈ پر ون ویلنگ کررہے تھے جنہیں تعاقب کرکے گرفتار کیا گیا۔
اس حوالے سے ترجمان ڈولفن آپریشنز ونگ نے میڈیا کو بتایا کہ ون ویلر کی گرفتاری کے موقع پر اہل علاقہ نے ڈولفن ٹیم سے مزاحمت کی تھی۔
ترجمان کے مطابق ملزم لاہور کی مختلف شاہراوں پرون ویلنگ کرتا تھا، ملزم نے خواتین کے ساتھ ون ویلنگ کی متعدد ویڈیوز وائرل کی تھیں۔
ملزم ٹک ٹاکر شاہنوازعرف چھوٹا بچہ کو گرفتار کرکے تھانہ شفیق آباد منتقل کردیا گیا، جہاں اس کے خلاف مقدمہ درج کرکے مزید کارروائی کا آغاز کردیا گیا ہے۔
ڈی آئی جی آپریشنز ڈاکٹر محمد عابد خان نے ڈولفن ٹیم کو شاباش دیتے ہوئے کہا کہ ون ویلنگ کرنے والے اپنی اور دوسروں کی جان کو خطرے میں ڈالتے ہیں لہٰذا ایسے اقدام سے گریز کیا جائے۔
