لاہور: کرائم کنٹرول ڈیپارٹمنٹ (سی سی ڈی) نے متنازعہ ٹک ٹاکر کاشف ضمیر کو ایک بار پھر گرفتار کرلیا ہے۔
تفصیلات کے مطابق کرائم کنٹرول ڈیپارٹمنٹ (سی سی ڈی) نے لاہور کے علاقے اقبال ٹاؤن سے ٹک ٹاکر کاشف ضمیر کو 13 گارڈز سمیت ایک بار پھر گرفتار کرلیا ہے۔
حکام کے مطابق ضمیر کو سوشل میڈیا پر وائرل ہونے والی ویڈیوز کے بعد حراست میں لیا گیا جس میں ٹک ٹاکر کے پرائیویٹ مسلح گارڈز کو عوام کے سامنے ہتھیاروں کی نمائش کرتے ہوئے دکھایا گیا تھا۔
ویڈیو سوشل میڈیا پر وائرل ہونے کے بعد سی سی ڈی نے فوری کارروائی کرتے ہوئے نہ صرف سوشل میڈیا شخصیت کو گرفتار کیا بلکہ ان کے 13 بھاری ہتھیاروں سے لیس گارڈز کو بھی گرفتار کیا۔
کاشف ضمیر اور ان کے پرسنل سیکیورٹی گارڈز کے خلاف متعدد دفعات کے تحت سی سی ڈی پولیس اسٹیشن میں مقدمات درج کیے گئے ہیں، جن میں اسلحے کی غیر قانونی نمائش اور عوام کی حفاظت کو خطرے میں ڈالنے کے مقدمات بھی شامل ہیں۔
پولیس ذرائع نے انکشاف کیا ہے کہ گرفتاری کے وقت گارڈز سے اسلحہ برآمد ہوا، حکام اب اسلحے کی قانونی حیثیت اور گارڈز کی تعیناتی کی تحقیقات کر رہی ہیں۔
واضح رہے کہ کاشف ضمیر اپنے شاہانہ طرز زندگی اور سوشل میڈیا تنازعات کی وجہ سے جانے جاتے ہیں، ماضی میں کئی بار دھوکہ دہی اور جعل سازی سمیت مختلف قانونی مقدمات میں ملوث ہونے کی وجہ سے سرخیوں میں رہے ہیں۔
اپریل میں بھی، لاہور پولیس نے سوشل میڈیا پر پولیس کی وردی کا مذاق اڑانے پر ٹک ٹاکر اور ایک پولیس کانسٹیبل کے خلاف مقدمات درج کیے تھے، جس کے بعد انہیں اور کانسٹیبل دونوں کو گرفتار کیا گیا تھا۔
