کراچی: بلدیہ ٹاؤن میں قتل ہونے والے ٹک ٹاکر کو مارنے والوں کا سراغ نہ لگایا جاسکا، ڈیڑھ ماہ بعد بھی ملزمان گرفتارنہ ہوسکے۔
تفصیلات کے مطابق ٹک ٹاکر انس کو گھر کے باہر قتل کیا گیا تھا جس کے بعد اب تک ملزمان کو پکڑنے کے حوالے سے کوئی ٹھوس پیش رفت نہیں ہوسکی ہے، ملزمان کی عدم گرفتاری پر مقتول ٹک ٹاکر کے اہلخانہ نے پولیس کے اعلیٰ افسران سے ملاقات کی۔
اہلخانہ نے بتایا کہ پولیس نے ملزمان کی جلد گرفتاری کی یقین دہانی کرائی ہے، پولیس کا کہنا ہے کہ ملزمان واردات کے بعد شہر چھوڑ کر فرار ہوگئے۔
پولیس نے مزید کہا کہ ملزمان کی گرفتاری کےلیے محکمہ داخلہ سندھ سے رابطہ کیا ہے، اجازت ملنے کے بعد گرفتاری کےلیے ٹیمیں تشکیل دی جائیں گی۔
کچھ ہفتوں قبل وفاقی دارالحکومت اسلام آباد میں ایک جنونی نوجوان نے ٹک ٹاکر ثنا یوسف کو گولیاں مارکر قتل کردیا تھا، واقعہ تھانہ سنبل کی حدود میں پیش آیا تھا جہاں 22 سالہ عمر نے گھر میں گھس کر ثنا یوسف کو گولیاں ماری تھیں۔
ٹک ٹاکر ثناء یوسف کا تعلق چترال سے تھا، پولیس کا کہنا تھا کہ ملزم کی کچھ دیر خاتون سے بات ہوئی اور وہ گھر کے باہر کھڑا رہا جس کے بعد فائرنگ ہوئی۔ ملزم نے مقتولہ کو دو گولیاں ماری اور فرار ہو گیا تھا۔
