ملکی تاریخ میں پہلی مرتبہ خواجہ سرا بھی بڑی تعداد میں بلدیاتی الیکشن کا حصہ بن رہے ہیں اور کامیابی کی صورت میں وہ بلدیاتی ایوانوں میں براجمان ہوں گے۔
اے آر وائی نیوز کے مطابق وقت اور سوچ بدلنے کے ساتھ اب حالات بھی تیزی سے بدل رہے ہیں اور معاشرہ خواجہ سراؤں کو بھی ان کی حیثیت کے ساتھ قبول کر رہا ہے جس کا نتیجہ یہ نکلا ہے کہ اب ملکی تاریخ میں پہلی بار خواجہ سرا بھی انتخابی عمل کا حصہ بن رہے ہیں۔
15 جنوری کو شہر قائد میں ہونے والے بلدیاتی انتخابات میں عوامی مسائل حل کرنے کا عزم اور منشور لیے خواجہ سرا بھی سیاسی میدان میں پیش پیش ہوں گے۔
کراچی کے میٹرو پولیٹن ایوان میں خواجہ سرا شہزادی رائے کو پیپلز پارٹی نے مخصوص نشست پر اپنا امیدوار نامزد کیا ہے۔
اس حوالے سے امیدوار شہزادی رائے کہتی ہیں کہ بلدیاتی کونسل میں قدم جمانے کے بعد اگلا ہدف قومی اسمبلی اور پھر وزارت عظمیٰ ہے۔
شہزادی رائے کا مزید کہنا ہے کہ میونسپل کارپوریشنز میں خصوصی نشست پر پہلی بار خواجہ سرا کونسل کا حصہ ہوں گے۔ ان کا یہ بھی کہنا ہے کہ کونسل جا کر وہ شہر کا مقدمہ لڑیں گے، ہمارے پاس شہر کا کچرا ٹھکانے لگانے کا بھی پلان ہے۔
دوسری جانب ایوانوں میں خواجہ سراوں کی نشستیں مختص کرنے سے برادری میں خوشی کی لہر دوڑ گئی ہے اور خواجہ سراؤں کی تنظیم نے بلدیاتی کونسل میں منتخب ہونے والے نمائندوں کی ٹریننگ کرانے کا بھی فیصلہ کیا ہے۔
