پاکستان میں ٹائرز کی پیداوار کے لیے گرین فیلڈ ٹائرز منصوبے کا آغاز ہونے جا رہا ہے۔
ایس آئی ایف سی کے تعاون سے عالمی مالیاتی اداروں کا پاکستان کی معیشت کو مستحکم کرنے میں کردار بڑھتا جا رہا ہے، جلد ہی اس سلسلے میں گرین فیلڈ ٹائرز منصوبہ بھی روبہ عمل ہوگا۔
بین الاقوامی مالیاتی کارپوریشن اور مقامی بینکوں کی جانب سے آرمسٹرانگ زیڈ ای پرائیویٹ کمپنی میں 50.2 ملین ڈالر تک کی مساوی سرمایہ کاری کی جائے گی، یہ منصوبہ مقامی ٹائروں کی پیداوار کو بڑھانے کے لیے سندھ کے علاقے گھارو میں قائم کیا جائے گا۔
اس منصوبے کے ذریعے مقامی مارکیٹ کی ضروریات کو پورا کرنے کے ساتھ ساتھ برآمدات میں بھی اضافے کا امکان ہے، 1,800 سے زائد ملازمتیں اور ٹیکنالوجی کی منتقلی کے ذریعے شعبے کی مسابقت میں اضافہ ہو جائے گا۔
اس منصوبے کے ساتھ پاکستان میں مقامی طور پر تیار کردہ بین الاقوامی معیار کے ٹائروں کا تعارف اور سستی، معیاری مصنوعات کی فراہمی کا آغاز ہوگا، اس سلسلے میں عالمی مالیاتی اداروں کا پاکستان کے ترقیاتی منصوبوں میں بڑھتا ہوا تعاون خوش آئند ہے۔
مقامی پیداوار میں اضافے سے درآمدات پر انحصار کم اور غیر ملکی زرمبادلہ کے ذخائر میں بہتری آئے گی، یہ منصوبہ پاکستان کی اقتصادی پوزیشن کو مزید مستحکم کرے گا اور عالمی سطح پر ایک نئی پہچان بنے گا۔
