اسلام آباد : ریاستِ پاکستان نے کالعدم تنظیم سے آہنی ہاتھوں سے نمٹنے کا فیصلہ کرلیا اور کہا ہے کہ ریاستی رٹ چیلنج کرنےوالوں کوبرداشت نہیں کیا جائے گا۔
تفصیلات کے مطابق ریاست پاکستان نے کالعدم تنظیم کی جانب احتجاج کے پیش نظر آہنی ہاتھوں سے نمٹنے کا فیصلہ کرلیا، ذرائع کا کہنا ہے کہ حکومت اور سیکیورٹی ادارے کالعدم تنظیم سے سختی سےنمٹنے کے لیے ایک پیج پر ہے ، ریاستی رٹ چیلنج کرنےوالوں کوبرداشت نہیں کیا جائے گا۔
کچھ دنوں سے کالعدم تنظیم نے احتجاج کی آڑ میں راستے بند کر رکھے ہیں، جس کے باعث لوگوں کو مشکلات کا سامنا ہے۔
خیال رہے کالعدم تنظیم کے اسلام آباد کی جانب لانگ مارچ اور شرکاء کو روکنے کے لیے پولیس کی شیلنگ جاری ہے، جگہ جگہ رکاوٹیں اور جہلم کے تینوں پلوں کی حفاظتی دیواریں توڑ کر کنٹینر رکھ دئیے گئے ہیں۔
اسلام آباد اورراولپنڈی میں بھی سیکیورٹی بڑھادی گئی ،چاندنی چوک سے فیض آباد تک مری روڈ سیل کردیا گیا ہے ، راستوں کی بندش سے شہریوں کو شدید مشکلات کا سامنا ہے۔
