راولپنڈی: ٹی ایل پی رہنماؤں کے خلاف راولپنڈی کے تھانہ ایئرپورٹ میں دہشت گردی کا مقدمہ درج کر لیا گیا۔
تفصیلات کے مطابق جامع ضیاء العلوم سے مذہبی منافرت پھیلانے کی کوشش پر تحریک لبیک پاکستان کے رہنماؤں کے خلاف راولپنڈی کے تھانہ ایئرپورٹ میں دہشت گردی کا ایک مقدمہ درج کیا گیا ہے۔
مقدمے میں سید عنایت الحق، مفتی عمیر، ڈاکٹر شفیق امینی، علامہ شفیق قادری سمیت 28 ملزمان کو نامزد کیا گیا ہے۔
مقدمے کے مطابق خفیہ اطلاع ملی کہ ملزمان جامع ضیاء العلوم میں چیف جسٹس پاکستان کے خلاف ملکی سطح پر جلسہ جلوس کا پروگرام طے کرنے کی میٹنگ کر رہے تھے، ملزمان نے چیف جسٹس کو برطرف کر کے نام ای سی ایل میں ڈالنے کی تقریر کی، جو مذہبی منافرت اور مجرمانہ سازش کی حامل ہے۔
ملزمان مسلح گن مینوں، مدرسے کے طالب علموں کے ہمراہ جلوس کی شکل میں آئے، ہائی کورٹ روڈ بلاک کر دی، مسلح گن مینوں کے سڑک پر آنے کے باعث عام شہریوں میں خوف و ہراس پھیلا، دہشت گردی کا سماں پیدا ہوا۔
مقدمے کے مطابق پولیس کے پہنچنے پر کچھ لوگ گاڑیوں میں سوار ہو کر جی ٹی روڈ سواں کی طرف اور طلبہ مدرسے کی جانب گلیوں میں بھاگ گئے، ملزمان نے چیف جسٹس کے خلاف شدید نعرے بازی کر کے اشتعال دلایا۔
