واشنگٹن: امریکی صدر ڈونلڈ ٹرمپ کا کہنا ہے کہ افغانستان میں اگر دوبارہ مسائل نے سر اٹھایا تو اس سے نمٹنے کے لیے انٹیلی جنس رکھیں گے۔
امریکی میڈیا سے گفتگو کرتے ہوئے ڈونلڈ ٹرمپ کا کہنا تھا کہ طالبان امن چاہتے ہیں، وہ تھک چکے ہیں، دراصل ہم سب ہی تھک چکے ہیں۔
انہوں نے کہا کہ وقت آگیا ہے، دیکھیں گے طالبان کے ساتھ کیا ہوتا ہے، افغانستان میں امن کے خواہاں ہیں۔
پوچھے گئے سوال پر امریکی صدر کا کہنا تھا کہ شام سے امریکی فوجی ایک ٹائم فریم کے تحت واپس آئے گی، عراق اور شام سے داعش کا 99 فیصد خاتمہ کردیا ہے۔
صحافی کے میکسیکو سرحد پر بارڈر کی تعمیر سے متعلق گئے سوال پر ٹرمپ نے اپنا مطالبہ دوبارہ دہراتے ہوئے کہا کہ اپوزیشن ملک کو مسائل میں الجھا رہے ہیں، دیوار کی تعمیر بہت ضروری ہے۔
دوسری جانب گذشتہ روز امریکی میڈیا نے یہ دعویٰ کیا تھا کہ افغان طالبان مفاہمتی عمل کو آگے بڑھاتے ہوئے آنے والے دنوں میں افغان اپوزیشن لیڈرز سے روس میں ملاقات کریں گے، افغان حکومت ان مذاکرات کا حصہ نہیں ہوگی۔
افغان طالبان آئندہ ہفتے روس میں افغان اپوزیشن پارٹیزسے ملاقات کریں گے
یاد رہے کہ قطر میں افغان طالبان سے مذاکرات کے بعد امریکی نمائندہ خصوصی برائے افغانستان نے کہا تھا کہ مذاکرات کا حالیہ دور گزشتہ ادوار سے بہت اچھا رہا، بات چیت کا تسلسل جاری رکھتے ہوئے جلد مذاکرات کا آغاز کریں گے۔
زلمے خلیل زاد نے یہ بھی کہا تھا کہ ابھی مکمل اتفاق نہیں ہوا، کچھ معاملات باقی ہیں، جب تک سب باتوں پر اتفاق نہیں ہو جاتا کچھ بھی منظور نہیں ہوگا۔
