نگراں وزیر اطلاعات مرتضیٰ سولنگی نے کہا ہے کہ آج قوم نے ہمارے جمہوری سفر میں ایک اور تاریخ رقم کی۔
تفصیلات کے مطابق نگراں وزیراطلاعات کی جانب سے عام انتخابات 2024 کے کامیاب انعقاد پر پاکستانی قوم کو مبارکباد پیش کی گئی ہے۔ انھوں نے کہا کہ جمہوری سفر میں قوم نے ایک اور تاریخ رقم کی ہے۔
مرتضیٰ سولنگی نے کہا کہ انتخابات کا پُرامن انعقاد تمام اسٹیک ہولڈرز کی اجتماعی کوششوں کا نتیجہ ہے۔
نگراں وزیر اطلاعات کا موجودہ انتخابات کے حوالے سے مزید کہنا تھا کہ ہر شہری کو امن اور سلامتی کے ساتھ ووٹ کا حق استعمال کرنے کا موقع ملا۔
واضح رہے کہ چیف الیکشن کمشنر سکندر سلطان راجہ نے الیکشن کے پرامن انعقاد پر قوم کو مبارکباد دی ہے۔
چیف الیکشن کمشنر کا کہنا تھا کہ ابھی ہم نے اپنی ذمہ داری کا ایک حصہ مکمل کیا ہے۔ اب غیرحتمی نتائج کی تیاری کا کام شروع ہوچکا ہے۔
انھوں نے کہا کہ اعتماد ہے کہ آراوز اہم کام کی تکمیل میں ذمہ داری کا مظاہرہ کرینگے۔ آراوز نتائج کی بروقت ترتیب اور ترسیل کو ممکن بنائیں گے۔
