The news is by your side.

Advertisement

پانچویں منزل سے گرنے والی بچی کے ساتھ کیا ہوا؟ ویڈیو دیکھیں

چین میں ایک 2 سالہ بچی پانچویں منزل کی کھڑکی سے گر پڑی تاہم اس کا سر کھڑکی کی سلاخوں میں پھنس گیا، ہولناک منظر دیکھ کر نیچے کھڑے افراد کی سانسیں رک گئیں۔

یہ واقعہ جنوبی چین میں پیش آیا جہاں گھر پر اکیلی موجود 2 سالہ بچی پانچویں منزل کی کھڑکی سے نیچے گر پڑی تاہم نیچے گرنے کے بجائے اس کا سر کھڑکی کی سلاخوں میں پھنس گیا اور وہ پانچویں منزل پر ہوا میں لٹک گئی۔

سوشل میڈیا پر وائرل ویڈیو میں دیکھا جاسکتا ہے کہ بچی کا سر کھڑکی میں پھنسا ہوا ہے اور وہ ہوا میں ٹانگیں چلا رہی ہے۔

یہ خطرناک منظر دیکھ کر نیچے موجود افراد کی سانسیں رک گئیں تاہم ایسے میں ایک پڑوسی نے اپنے حواس بحال رکھے اور تیزی سے بچی کی مدد کو لپکا، پڑوسی قریب موجود گیس پائپ پر چڑھ کر پانچویں منزل تک پہنچا اور بچی کو ہاتھوں سے سہارا دیا۔

اس دوران دیگر پڑوسیوں نے ریسکیو اہلکاروں سے مدد طلب کی، ریسکیو اہلکاروں کے پہنچنے اور پھر عمارت میں داخل ہو کر، مذکورہ گھر تک پہنچنے اور دروازہ توڑ کر اندر داخل ہونے تک تقریباً 30 منٹ کا وقت لگا، اس دوران مذکورہ پڑوسی خود بھی بچی کو سہارا دینے کے لیے کھڑکی اور پائپ کے سہارے لٹکا رہا۔

مذکورہ پڑوسی ایک ریٹائرڈ فوجی اہلکار تھا جس کی ٹریننگ اس موقع پر کام آئی۔ ریسکیو اہلکاروں نے بچی کو بحفاظت سلاخوں سے نکال لیا، اس دوران بچی کو کوئی چوٹ نہیں پہنچی۔

بعد ازاں بچی کی ماں نے مقامی میڈیا کو بتایا کہ وہ اپنے دوسرے بیٹے کو لے کر ڈاکٹر کے پاس گئی تھی، بچی گھر میں سو رہی تھی اور اس کا خیال تھا کہ وہ اس کے جاگنے سے پہلے واپس آجائے گی لیکن اسے دیر ہوگئی۔

ماں نے ریسکیو اہلکاروں اور پڑوسی کا بے حد شکریہ ادا کیا جنہوں نے اس کی بچی کی جان بچائی۔

Comments

یہ بھی پڑھیں