گاڑی چلانے سے پہلے دروازوں کو لاک کرنے کی تاکید اس لیے کی جاتی ہے تاکہ کوئی بڑا سانحہ پیش نہ آجائے کیونکہ تیزرفتاری میں بعض اوقات اندر بیٹھا شخص ایک دم گیٹ سے ٹکراتا ہے جس کی وجہ سے اکثر چلتی گاڑی میں دروازہ کھل جاتا ہے۔
انٹرنیٹ پر ایک ایسی ویڈیو وائرل ہوئی جسے دیکھ کر آپ کا دل دہل جائے گا۔ سماجی رابطے کی اور مائیکرو بلاگنگ ویب سائٹ ٹویٹر پر شیرین خان نامی صارف نے برطانوی ادارے دی سن کی جانب سے جاری کی جانے والی ایک دل دہلا دینے والی ویڈیو شیئر کی۔
یہ ویڈیو کس مقام کی ہے اس بارے میں تفصیلات سامنے نہیں آسکیں مگر جہاں حادثہ پیش آیا یہ مصروف ترین شاہراہ ہے، جس میں دیکھا جاسکتا ہے کہ ایک گاڑی اشارے (سگنل) پر رکی اور جب دوبارہ چلنے لگی تو پیچھے کا دروازہ کھل گیا، جس کے بعد اندر بیٹھا بچہ سڑک پر گر پڑا۔
How can this even happen? pic.twitter.com/WXnWLeYIQY
— Shirin Khan شیرین (@KhanShirin0) March 16, 2021
ویڈیو میں دیکھا جاسکتا ہے کہ مصروف شاہراہ پر دیگر گاڑیاں بھی موجود تھیں جنہوں نے سگنل کھلنے کے بعد اپنی منزل کی جانب روانگی اختیار کی مگر سڑک پر بچے کو دیکھ کر گاڑیاں آہستہ کیں یا انہیں دوسری طرف موڑ لیا۔
خوش قسمتی سے حادثے میں بچے کو کوئی چوٹ نہیں آئی اور وہ چند سیکنڈ میں کھڑا ہوکر اپنی گاڑی کی طرف بھاگنے لگا۔ جس لمحے وہ اپنی گاڑی کی طرف دوڑ رہا تھا، اُس وقت دوسری طرف سے آنے والا سگنل بند تھا۔
وہاں موجود ایک خاتون نے اپنی موٹرسائیکل آگے بڑھائی اور بچے کو اپنے پاس بلایا، اسی دوران گاڑی میں سے بھی خاتون نکل کر بھاگتی ہوئی بچے کے پاس آئیں اور اُسے گود میں اٹھا کر پیار کرنے لگیں۔
