انگلینڈ ٹیم کے فاسٹ بولر ٹام کرن نے آخری ٹوئٹ کر کے ٹوئٹر چھوڑنے کا اعلان کر دیا۔
تفصیلات کے مطابق انگلینڈ کرکٹ ٹیم کے فاسٹ بولر ٹام کرن نے بلیو ٹک سے محرومی کے بعد سماجی رابطوں کی ویب سائٹ ٹوئٹر کو چھوڑنے کا اعلان کر دیا ہے۔
اتوار کے روز آل راؤنڈر اور انگلینڈ کی 2019 ون ڈے ورلڈ کپ جیتنے والی ٹیم کے رکن ٹام کرن نے تصدیق کی ہے کہ وہ بلیو ٹک کھونے کے بعد مائیکروبلاگنگ پلیٹ فارم ٹوئٹر استعمال نہیں کریں گے۔
ٹام کرن سوشل میڈیا پلیٹ فارم پر غیر فعال تھے کیوں کہ انھوں نے تقریباً ایک سال بعد اپنا پہلا ٹویٹ کیا، ٹوئٹر پر لاگ ان ہونے کے بعد انھوں نے دیکھا کہ ان کے اکاؤنٹ سے بلیو ٹک ہٹا دیا گیا ہے، جس پر انھوں نے رد عمل ظاہر کیا۔
Haha just seen I’ve lost my blue tick too. Not that that is important! Is that the $7 Elon Musk thing? Haha that’s funny. Still hate twitter. Probs not come on for ages again. Be kind on here ppl. That’s all. Bye 💙🙏🏼💫
— Tom Curran (@TC59) January 29, 2023
ٹام کرن اپنی ٹویٹ میں لکھا ’’ہاہا، ابھی دیکھا کہ میرا بلیو ٹِک ختم ہو گیا ہے، یہ کوئی اہم چیز نہیں ہے، لیکن کیا یہ ایلون مسک کے 7 ڈالر والی پالیسی کی وجہ سے ہوا ہے؟ ہاہا یہ مزاحیہ بات ہے۔‘‘
ٹام کرن نے لکھا کہ وہ ابھی بھی ٹوئٹر سے نفرت کرتے ہیں، اور شاید وہ یہاں کبھی واپس نہ آئیں، انھوں نے لکھا کہ ’’ایک دوسرے کے ساتھ رحم دلی سے پیش آئیں، چلتا ہوں، بائے۔‘‘
واضح رہے کہ جنوبی افریقی نژاد انگلش کھلاڑی ٹام کرن زمبابوے کے سابق کرکٹر کیون کرن کے بیٹے اور انگلینڈ کے اسٹار بولر سام کرن کے بھائی ہیں۔
ٹام کرن کو ٹوئٹر پر 66 ہزار افراد فالو کر رہے ہیں اور خود انھوں نے 225 اکاؤنٹس کو فالو کیا ہوا ہے۔
