ٹماٹر کا شمار ان سبزیوں میں کیا جاتا ہے جو مختلف کھانوں کا ذائقہ بڑھانے کے لیے استعمال کی جاتی ہیں، جب کہ اسے صحت کے لیے بھی بہت مفید سمجھا جاتا ہے، ٹماٹر کو اس کے خوش ذائقہ ہونے کی وجہ سے کچھ علاقوں میں پھل بھی کہا جاتا ہے۔
ٹماٹر میں وٹامن اے، وٹامن سی، فائبر، فولیٹ اور کیلشیم جیسے بہت سے غذائی اجزاء پائے جاتے ہیں، جو صحت کے لیے بہت فائدہ مند تصور کیے جاتے ہیں۔
ٹماٹر میں اینٹی آکسیڈنٹ خصوصیات بھی پائی جاتی ہیں جو ذیابیطس اور کینسر جیسی کئی بیماریوں سے بچانے میں مددگار ثابت ہوسکتی ہے۔
کولیسٹرول، اعصابی تناؤ، ہڈیوں اور ناخنوں کی کمزوری، الرجی اور خشک جلد سے بچاؤ میں وٹامن سی اہم کردار ادا کرتا ہے، دل کی بیماریوں سے بچاؤ میں وٹامن سی معاون ہے۔
موسم سرما میں اس پھل سے بہت سے طبی فوائد حاصل کیے جاتے ہیں۔ ٹماٹر میں پائے جانے والے غذائی اجزاء کی وجہ سے ان طبی فوائد کے جسم پر اثرات زیادہ دیر تک برقرار رہتے ہیں۔
ان اجزاء میں وٹامن اے، بی، بی 3، بی6، آور بی 7 شامل ہیں، اس کے ساتھ ساتھ ٹماٹر میں میگنیشیم، آئرن، کرومیم، پوٹاشیم، زنک، اور کولین بھی پایا جاتا ہے۔
اس کے علاوہ ٹماٹر میں پچانوے فیصد تک پانی پایا جاتا ہے جبکہ پانچ فیصد کاربو ہائیڈریٹس اور فائبر پائے جاتے ہیں۔ ایک سو گرام ٹماٹر میں اٹھارہ کیلوریز، پچانوے فیصد پانی، ایک گرام پروٹین، چار گرام کاربو ہائڈریٹس، اڑھائی گرام شوگر، ڈیڑھ گرام فائبر، اور تقریباً آدھا گرام فیٹ پایا جاتا ہے۔
ٹماٹر ایک ایسی سبزی یا پھل ہے جسے سلاد کے طور پر کچا بھی استعمال کیا جاتا ہے جب کہ اس سے بننے والی چٹنیاں بھی بہت شوق سے کھائی جاتی ہیں، ٹماٹر کی تاثیر ٹھنڈی ہوتی ہے، اس لیے اسے سرد موسم میں زیادہ مقدار میں استعمال نہیں کرنا چاہیئے۔
