The news is by your side.

Advertisement

مصری لڑکے نے سارے دانت نکلوا کر محبوبہ کے لیے ہار بنا لیا، سچ کیا ہے؟

قاہرہ: مصر میں ایک نوجوان نے محبت کی یقین دہانی کے لیے اپنی بتیسی کا ہار بنا کر محبوبہ کو پیش کر دیا، لیکن اس نے پھر بھی ٹھکرا دیا۔

تفصیلات کے مطابق چند دنوں سے سوشل میڈیا پر ایک خبر گردش کر رہی ہے، اور ایک تصویر سامنے آئی ہے جس میں ایک مصری نوجوان نے ہاتھ میں دانتوں سے بنا ہار پکڑا ہوا ہے، جب دوسری طرف سیاہ شرٹ میں بغیر دانتوں کا ایک نوجوان بیٹھا ہے۔

خبر میں بتایا گیا کہ کیک نامی مصری نوجوان نے اپنی محبوبہ لیزا کو محبت اور وفاداری کا یقین دلانے کے لیے اپنے سارے دانت اکھاڑ کر ان کا ہار بنایا اور لڑکی کو پیش کر دیا۔

لڑکی نے اس پر الزام عائد کیا تھا کہ وہ کسی اور لڑکی میں دل چسپی رکھتا ہے جس پر مصری نوجوان نے یہ انتہائی قدم اٹھایا، بتایا گیا کہ دونوں کی دوستی چار ماہ قبل ہوئی، لیکن پھر لڑکی نے بات چیت بند کر دی تھی۔

لڑکے نے لیزا کو صرف آخری بار ملاقات کا پیغام بھیجا، جس پر لڑکی راضی ہو گئی اور طے شدہ ریسٹورنٹ پر دونوں پہنچ گئے۔ لڑکی جب ریسٹورنٹ پہنچی تو کیک نے اپنی بتیسی کا بنا ہار لڑکی کو پیش کر دیا، جس پر لڑکی نے اسے پاگل قرار دے کر تعلق بالکل ختم کر دیا۔

فیکٹ چیک

تاہم یہ خبر ایک مذاق نکلی، روئٹرز نیوز ایجنسی کے مطابق سوشل میڈیا پر یہ پوسٹ 31 اکتوبر 2021 کو ایک اداکار مصطفیٰ سلیمان السید نے کی تھی، مصطفیٰ نے بتایا کہ ان کی تصویر کو ایڈٹ کر کے ایسا بنایا گیا کہ وہ بغیر دانتوں کی دکھائی دینے لگی۔

تصویر کے ساتھ جو کیپشن لگایا گیا تھا، اصل میں عربی میں تھا، جس میں کہا گیا تھا کہ ‘میں نے محبت کے سب سے خوب صورت معنی جو کبھی دیکھے ہیں، یہ ہے کہ آپ اپنے تمام دانت اتار کر اس انسان کو دے دیں جس سے آپ محبت کرتے ہیں۔’

روئٹرز کی جانب سے سلیمان سے رابطہ کیا گیا تو انھوں نے تصدیق کر دی کہ یہ اسٹوری حقیقی نہیں، بلکہ انھوں نے ایک مذاق کے طور پر اسے پوسٹ کیا تھا۔

سلیمان نے مقامی میڈیا کو یہ بھی بتایا کہ ان کی پوسٹ کا مقصد 4 نومبر کو مصر میں منائے جانے والے ویلنٹائن ڈے سے قبل لوگوں کے لیے ایک مذاق تھا۔

روئٹرز کا کہنا ہے کہ ہار کی تصویر کے ماخذ کی تصدیق نہیں کی جا سکی، لیکن یہ تصویر کم از کم 2016 سے آن لائن زیر گردش ہے۔ ہسپانوی زبان میں بزفیڈ کے ایک مضمون کے مطابق یہ ہار Etsy پر فروخت کے لیے پیش کیا گیا تھا۔

مصطفیٰ سلیمان السید

دل چسپ بات یہ ہے کہ مصری اداکار مصطفیٰ سلیمان کی یہ پوسٹ کئی ممالک میں شیئر کی گئی ہے، اور اس کے حوالے سے خبریں بنی ہیں، ان میں پاکستان اور بنگلا دیش بھی شامل ہیں۔

سلیمان نے پاکستان اور بنگلادیش میں اس حوالے سے شائع شدہ خبروں اور پوسٹس کو اپنے فیس بک اکاؤنٹ پر شیئر کر کے دل چسپ تبصرہ بھی کیا ہے۔

سلیمان نے ایک اور مذاق کرتے ہوئے لکھا: ان شاء اللہ میں کل صبح 9 بجے پاکستانی چینل پر حاضر ہوں گا، اور میں اپنی انگریزی کا ذمہ دار نہیں ہوں۔

Comments

یہ بھی پڑھیں