اسلام آباد: توشہ خانہ کے نئے کیس میں جیل سماعت اور جیل ٹرائل کی منظوری دے دی گئی۔
تفصیلات کے مطابق بانی پی ٹی آئی اور بشریٰ بی بی کی گزشتہ روز نئے نیب کیس میں گرفتاری ڈالی گئی ہے، وفاقی حکومت نے اس سلسلے میں جیل سماعت اور جیل ٹرائل کی منظور دے دی، وزارت قانون و انصاف نے نوٹیفکیشن جاری کر دیا۔
جیل ٹرائل کا نوٹیفکیشن نیب آرڈیننس 1999 کی سیکشن 16 بی کے تحت جاری کیا گیا ہے، وزارت قانون و انصاف کا کہنا ہے کہ سیکیورٹی وجوہ پر ٹرائل جیل میں ہی ہوگا۔
نوٹیفکیشن میں کہا گیا ہے کہ اگر امن و امان کے پیش نظر نیب عدالت ضروری سمجھتی ہے تو ٹرائل جیل میں کرے، جیل ٹرائل نوٹیفکیشن سے متعلق بانی پی ٹی آئی اور بشریٰ بی بی کے وکلا کو آگاہ کر دیا گیا۔
توشہ خانہ کے نئے ریفرنس میں بانی پی ٹی آئی اور اہلیہ کے جسمانی ریمانڈ کے لیے اڈیالہ جیل میں آج سماعت ہوگی، احتساب عدالت کے جج محمد علی وڑائچ، بانی پی ٹی آئی اور بشریٰ بی بی کے وکلا اڈیالہ جیل پہنچ گئے ہیں، چوہدری ظہیر عباس ایڈووکیٹ اور عثمان گل عدالت میں پیش ہوں گے۔
ادھر جیل ذرائع کا کہنا ہے کہ لاہور پولیس کے 11 افسران پر مشتمل ٹیم بھی اڈیالہ جیل پہنچ چکی ہے، لاہور پولیس کی ٹیم بانی پی ٹی آئی سے 9 مئی کے مقدمات پر تفتیش کرے گی۔
