اسلام آباد : پی ٹی آئی کے رہنما اور سابق وزیر اعظم عمران خان کے معاون خصوصی زلفی بخاری نے توشہ خانہ کی گھڑی کی فروخت کے حوالے سے اہم وضاحت دے دی۔
اے آر اے وائی نیوز کے پروگرام اعتراض ہے میں انہوں نے بتایا کہ عمران خان نے گھڑی کی فروخت سے رقم پر کیپٹل گین ٹیکس دیا ہوا ہے اور اس کی رقم بھی ڈیکلیئر کی ہوئی ہے۔
زلفی بخاری نے کہا کہ عمران خان کی جانب سے گھڑی کی رسیدیں بھی دکھائی گئی ہیں، ایک نجی ٹی وی چینل باقاعدہ عمران خان کے خلاف پروپیگنڈا مہم چلارہا ہے۔
ایک سوال کے جواب میں ان کا کہنا تھا کہ مذکورہ چینل اب ایک اور شخص کو سامنے لے کر آیا ہےجس نے24گھنٹے میں2ویڈیوز بنائیں۔
انہوں نے بتایا کہ اس شخص نے پہلے ایک ویڈیو میں کہا کہ گھڑی2لاکھ50ہزار ڈالرکی بیچی، پھر اسی شخص نے دوسری ویڈیو میں کہا کہ گھڑی بیچی نہ ہی خریدی۔
زلفی بخاری نے اس بات حیرت کا اظہار کرتے ہوئے کہا کہ 24گھنٹے میں ایسا کیا ہوگیا کہ وہ شخص اپنے پہلےبیان سے ہی مکر گیا۔
مزید پڑھیں : عمران خان کو ملنے والی گھڑی کس کو فروخت کی گئی؟ اے آر وائی نے پتا لگا لیا
یاد رہے کہ سابق وزیر اعظم عمران خان نے گزشتہ دنوں ایک نجی ٹی وی چینل کے اینکر پرسن اور عالمی سطح پر مطلوب عمر فاروق ظہور نامی شخص کے خلاف برطانیہ اور متحدہ عرب امارات میں قانونی کارروائی شروع کرنے کا اعلان کیا ہوا ہے۔
